Pynlut por baroh shisngi u Myntri Rangbah ban ïakynduh ïa ki paidbah ha ka thaiñ Phulbari bad Rajabala

Shillong, Nailur 21 : U Myntri Rangbah ka Jylla Conrad K Sangma mynta ka sngi u la pynlut por baroh shisngi ha ka thain Phulbari bad Rajabala ka West Garo Hills, bad ïakynduh markhmat ïa ki paidbah ha ki shnong jong ki ban ïa kren bad ki paidbah ha Rongadatgre, Chandigre, Chibinang, Shyamnagar bad Bhaitbari, bad sngap da la ki jong ki skhor ïa ki jingeh ba ki ïakynduh.
Ïa u Myntri Rangbah la synran da u MLA ka Phulbari u Abu Taher Mandal bad u MLA ka Selsella Arbinstone Marak.
Kane ka jingleit iuhkjat ka long kongsan bha naba ka dei shibynta na ka jingpyrshang jong u Myntri Rangbah ban leit iuhjat ha kylleng ki jaka ka Jylla bad ban ïakynduh markhmat ïa u paidbah, khamtam ha ki jaka nongkyndong bad kiba kyndong bha. Da ka jingïakynduh ïa ki nongshongshnong hala ki jong ki shnong, ka Sorkar ka thmu ban pynthikna ba ïa ki jingdonkam jongki paidbah ha man ki shnong yn sngewthuh ha ka kyrdan kaba halor tam khlem da ïaid lyngba kiwei lane pynslem.
Ha Rongadatgre, ki paidbah na kylleng ki jaka jong ka Demdema C&RD Block bad Batabari C&RD Block kila ïalum khrui ban ïakynduh ïa u Myntri Rangbah. Ki Nongtrei jong ka kynhun CM-Connect kila ïadonlang ban buh jingthoh ïa ki jingeh bala pynsngew da ki nongshongshnong, khnang ba yn lah ban buddien ïa ki.
Haba kren ha ka jingïalang, u Myntri Rangbah ula ong ba ka jingthmu jong kane ka jingwan iuhkjat ka long ban sngap ïa ka jingeh jong u paidbah dalade.
“Ka dei ka jingpyrshang jong ka Sorkar ban poi sha man ki kyndong kynshrot jong ka Jylla. Nga la leit iuhkjat ha kylleng ki jaka jong ka Jylla ban sngewthuh ïa ka jingeh u paidbah dalade. Ka jingwna mynta ka sngi ka long shibynta na kane ka kam, ha kaba nga la ïakren bad ki paidbah, sngap ïa ki jingeh jong ki bad ai ïa ki jingbthah kiba donkam” ula ong.
Haba kubur ba don bun ki mat ba la pynsngew, ula ong ba ym baroh lah ban pynbeit shisien pynbeit, hynrei ka Sorkar kan pyrshang katba lah ban pynbeit ïa ki jingeh jong u paidbah.
“Kum ka Sorkar, ngi sngap bad wanrah ïa ki lad ki lynti ka ban ïarap ïa ki briew jong ngi ba kin kiew. Ngi kwah ban pynthikna ba ki briew jong ka Jylla jong ngi kin ïoh ïa ka kabu ban pynsngew ïa ki jingeh jong ki hakhmat u Myntri Rangbah. Ka kynhun jong ngi kan buh jingthoh ïa baroh ki jingeh bala pynsngew bad kan pyrshang ban pynbeit ïa ki kat kum ki jingdonkam ka ban long ruh da ka por” ula bynrap.
Ha Iew Chibinang, ki nongshong shnong kila aiti ïa ka dorkhas, kaba pynpaw hakhmat eh ïa ka jingsngewkhïa halor ka surok bad ki lad pynïasoh. Haba jubab ïa kine ki jingdawa bala slem bha, u Myntri Rangbah u pyntip ha ka jingïalang ba ka Sorkar kala dep aiti ïa ka work order ban pynbeit ïa ka jingeh haba ïadei bad ka jingpynïasoh surok ha ki jaka them jong ka West Garo Hills khamtam ha Phulbari, Rajabala bad New Bhaitbari.
Ha kane ka jingleit iuhkjat, u Myntri Rangbah ula leit jurip ruh ïa ka jingpyntrei ïa ka stadium ba dang ïaid mynta ha Shyamnagar. Kane ka project ka long shibynta na ka jingkyntur ka Sorkar ban tei ïa ki jingtei kiba lah ban sei ïa ka sap jong ki samla ka thain.
Ka jingleit iuhkjat sha Phulbari bad Rajabala ka pyni ïa ka thong ba kham heh jong ka Sorkar haba ïadei bad ka roi ka par kaba kynthup lang ïa baroh, ha kaba ka synshar khadar kan ym kut tang ha nongbah hynrei ka poi sha man ki shnong.