Pan jingpynshai ka Dorbar Shnong Mukroh Pyllun halor ka jingwan ïaidkjat ki pulit Assam hapoh shnong

Jowai, Nailur 21: Ka Dorbar Shnong Mukroh Pyllun West Jaiñtia Hills District kala pan jingpynshai na ka tnad ‘Barato Police Outpost’ halor ka jingwan rung bad ïaid kjat jubor ki pulit ka Assam mynta ka sngi 21 tarik u Nailur shapoh u pud u sam ka shnong khlem da ïoh jingbit na ka Dorbar Shnong.
Katkum katei ka jingujor la ïathuh ki pulit Assam ha ryngkat ki Uniform bad ki tiar suloi kiba don haduh kumba 20 ngut eiei kila leit rung shapoh ka shnong Mukroh haka por 12:45 nohphai sngi shaduh ki bynta ka Phlong jong ka shnong Mukroh kaba la pynsyier mynsiem ïa kiba bun ba lang khamtam ïa ki nongshong shnong.
Kitei ki Pulit Assam kila pynlong ruh ka jingïaid kjat lyngba ka surok NEC bad shapoh ka surok shnong naduh Lumthidow shaduh Phlong jong ka shnong Mukroh, la synran lang ïa ki da ki katto katne ki lad pathai khubor na Assam kiba la ring dur lang ha katei ka por.
Halor kane ka shnong ka kwah ban pan jingpynshai na ka ophis jong ka Barato Outpost bad na ka tnad Pulit ka West Jaiñtia Hills la ka don kano kano ka jingpyntip lypa halor ka jingwan ïaid kjat ki Pulit Assam hapoh Shnong Mukroh, lada ka don balei pat ym shym la ai jingpyntip sha ka Dorbar Shnong?.
La buh jingkylli ruh balei kitei ki pulit Assam kila leit rung shapoh ka shnong Mukroh khlem da pynlong ka jingïatip lang na baroh arliang, sa kawei ruh balei kila ïoh lad ban rung lyngba ka Barato Police Outpost kaba don ïa ki pulit bad leit poi shaduh Phlong.
Kum ban shu pynkynmaw ïa ka jingjia ba sngewsih haka shnong Mukroh halor ka jingshah siat ïap ki nongshong shnong ha ki pulit Assam haka 22 tarik u Naiwieng, 2022.Da kaba ong kane ka jingwan jong ki Pulit Assam hapoh shnong khlem jingtip ka wanrah ïa ka jingtieng jingsmiej ïa ki paidbah.
Katkum katei ka shithi pan jingpynshai bala soi da u Waheh Shnong bad u Secretary ka Dorbar Shnong Mukroh Pyllun, la dawa nangne shakhmat ym dei shuh ban jia kum kine ki jingwan rung jubor khlem ka jingpyntip, la dawa ruh na ki pulit jong ka Mukroh BOP bad ki dei ban pynthikna ïa ka jingshngaiñ jong ki trai shnong.