Kaei ba ka BJP kan ïoh na ka jingleit pynïasoh jong ki MLA ka UDP

Shillong, Nailur 20: U President jong ka Voice of the People Party (VPP) bad u MLA ka Nongkrem, u Bah Ardent Miller Basaiawmoit u la ong ba ka party ka leit sha ki paidbah da ka jingthmu ban hikai shaphang ka sain pyrthei bad kumno ban jied ïa ki nongmihkhmat bad kaei ka bynta jong ki nongthaw aiñ bad kumjuh ruh ka jingïapher hapdeng ki seng riewlum bad ki seng heh paid.
“Kum ka party ka dei ka kam ram jong ngi ban hikai ïa ki paidbah halor ka saiñ pyrthei, ka jingsngewthuh bad kumjuh ruh ban ïathuh ïa ki paidbah halor ka saiñ pyrthei,” ong u Bah Basaiawmoit.
Haba ïadei bad ka jingthmu jong ki katto katne ngut ki MLA jong ka United Democratic Party (UDP) ba ki kwah ban pynïasoh bad ka BJP, na ka liang jong u u khlem da la kren shai hynrei u la buh ka jingkylli ba kaei ka jingkwah jong ka BJP ban ïoh ka jingpynphai khylla ne kaei ba ka BJP ka kwah ban ïoh nong na kane ka jingwan rung ki MLA ka UDP.
“Kaei kaba ki kwah ban ïoh ha kaba wanphai da ka ne ka jingdawa jong ka UDP. Kaei kaba ki kwah ban synshar ïa ka Meghalaya bad kaei kaba ki kwah ban ïoh na ka jylla,” u la ong.