Kyntu bad banjur u Myntri ban shimkabu ïa kane ka skhim na ka bynta ka koit ka khiah
Pynsngewthuh ka DM&HO halor ka jingmyntoi na ka skhim MHIS-PMJAY
Jowai, Nailur 20: Ka ophis District Medical and Health Officer, West Jaiñtia Hills ha kane ka sngi saitjaiñ kala pynlong ïaka prokram pynsngewthuh paidbah halor ka Meghalaya Health Insurance Schemes-Pradhan Mantri Jan Arogya Yojana (MHIS-PMJAY) haka jingïalang bala long ha Mihmyntdu Lumpyrdi Community Hall, Mihmyntdu.
Ka jingthmu jong kane ka prorkam ka long shi bynta ban thaw ïa ki lad ki lynti ban pynsngewthuh paidbah bad ban pynrung kyrteng ïa ki hapoh ka Meghalaya Health Insurance Scheme na ka bynta ban ïoh shibun ki jingmyntoi haka liang ka koit ka khiah.
Na ka liang u myntri ka koit ka khiah jong ka sorkar jylla u ma Wailadmiki Shylla haba ai jingkren uba pynsngew shaphang ki jingïoh myntoi naka skim MHIS-PMJAY bad ula kyntu ïa ki paidbah ba kin shim ïa kane ka kabu bala ai da ka sorkar, ha ka juh ka por u kyntu ban pynrung kyrteng ïalade katba lah.
Shuh shuh u Myntri ula ban jur ïa ka jingdonkam ban pynïasoh ïa u Aadhaar khnang ban ïoh ïa ki jingmyntoi hapoh ka MHIS-PMJAY. Ula kyntu ïa ki paidbah ba kim dei ban ap haduh ba kin da pang ne shitom, hynrei dei ban pyndep shwa ïa ki jingdonkam khnang ban ïoh jingkyrshan haka koit ka khiah haka por ba donkam.
Halor MHIS-PMJAY u myntri ula pynshlur ïa ki nongshong shnong ban ïasam lem ïaki jingtip shaphang kane ka skim, khnang ba ïoh shibun ki jingmyntoi.
Ha kane ka sngi la ïoh ruh ka kynta kylli jingkylli bad ki jubab bala pynshai da ki nongtrei ka tnad ka koit ka khiah. Ka kong B.Warjri, kaba dei ka CEO ka MHIS-PMJAY kala pynpaw ïa ki jingmyntoi kiba lah ban ïoh naka MHIS.
Ha kane ka prokram la pyni ruh shaphang ka jingïoh myntoi jong ki paidbha lyngba ka State Nodal Agency (SNA)-MHIS, da kaba pyni ïa ka video shaphang ka Jaraiñ PHC. U Medical Officer ba dei peit ïa ka Jarain PHC u Dr. F. Lamin ula pynsngew halor ka jingshem jong u shaphang kane ka skhim kaba la ai jingshakri kaba khraw eh haka koit ka khiah sha baroh ki nongïoh jingmyntoi.
Ha kane ka prokram la wan ban ïashim bynta lang da ka District Medical & Health Officer, WJH ka Dr. P. Shylla, ka DMHO jong ka EJHD Dr. B.Warjri, Assistant Commissioner ka Jowai, ka kong LBR Marak,MCS, ki nongtrei MHIS naduh ka Jylla bad na ka District kumjuh, ki Doktor bad ki nongtrei jong ka tnad ka koit ka khiah.