Jowai, Nailur 20: Kawei na ki seng treimon sngewbha kaba la tip kum ka Dedicated for Public Tranformation (DPT) Jaiñtia Hills Society, kaba ka phang pdeng ka jong ka long “Serve Support Uplift”, kaba naduh u snem 2015 bad kane ka seng kaba juh leh ïa ki kam ïarap na ka por sha ka por na ka bynta ka bha ka miat ha ka imlang sahlang khamtam ban ïarap kylliang ïa kiwei ki para briew kiba ïa kynduh ïa ki jingeh bad jingjynjar ha ki bynta bapher bapher.
Mynta ka sngi jong ka 19 Nailur, kane ka Society ka la ïoh ban ai ïarap da ka ïing sah na ka bynta kawei ka long ïing jong ki khynnah ba don 7 ngut shi hymen shi para ha shnong Tum Tum kaba don hajan ka shnong Sahsniang jong ka West Jaiñtia Hills District.
Hashwa ban aiti ïa kane ka iing sha kitei ki khynnah, la don ka jingïalang kaba lyngkot, ha kaba la ïoh ïa ki kyntien sneng kyntiew kraw na ki dkhot ki nongïalam Society kumjuh na u Pastor jong ka than u Rev Dr. E.M. Ch Passah, kumjuh ruh ka jingkren pdiang na ka mei ieit bad ki kur jong kitei ki khynnah.
Na ka liang u Chairman ka DPT u ma Pyndap Shadap, haba kren u la ong ba bunsien hi ba kane ka Society, ka juh ai ka jingïarap ïa ki briew kiba kynduh ïa ki jingeh bapher bapher khamta ïa ki khynnah ki la duh noh ïala ki jong ki kmie ki kpa ki jong ki naduh ba ki dangrit. Ula ong ruh ba don shibun ki briew kiba la ïa kynduh ha ka jingeh naduh ba ki dang khynah, hynrei kim dei ban duh jingkyrmen, da kaba long ki khynnah kiba tip sngi ne im ka jingim kaba khuid ba suba.
Na ka liang u Rev Shadap ula ai mynsiem ïa kine ki hynñiew ngut ki shi para kiba kynthup ïa saw ngut ki shynrang bad lai ngut ki kynthei, ba kim dei ban long kiba duh jingkyrmen ha ka jingim jong ki, u la ong ba ki dei ban shaniah ha U Blei bad im ka jingim kaba bha bad ba tip sngi, namar wat lada kim don ki kmie ki kpa ha kane ka pyrthei hynrei U Blei u ïohi i bad sumar ruh ïa baroh ki briew.
Ha kane ka sngi la ïoh ruh ki jingkren na u Waheh Shnong Tum Tum Wanpyrkhat Lyngdoh, Secretary ka DPT Rimiki Dkhar, haka jingïadonlang kiwei de ki dkhot kiba kynthup ïa u Iaishah Sutong, kong Christine Sten, kong Aidashisha Lyngdoh bad kiwei de.
