Shillong, Nailur 20: Ka Mawpat SC ka la pynkut ïa ka jingïakhun shuwa ban jam sha ka First Division ha ka samoi ban wan da kaba pynliem 2-0 ïa ka Sohryngkham SC ha ka phainal ban rah ïa ka nam lahduh jong ka lympung phutbol Second Division 2026, ha ka sngi Saitjaiñ.
ïa kane ka lympung la pynlong da ka Shillong Sports Association, ha kaba baroh ar tylli ki kynhun ki ladep ban pynthikna ban kiew kyrdan sha ka First Division da kaba poi sha ka phainal.
Haba phai sha ka jingïakhun, ka Mawpat ka la lamkhmat ïa ka kylla step lyngba ka kol jong u Andyson Lapang (16′) shuwa ba u Reform Pale (68′) un pynskhem ïa ka jingjop da kaba pynjlan ar shah ïa ka kol lamkhmat.
Kum ka lahduh ka Mawpat ka la ïohpdiang ïa ka khusnam pisa kaba Rs 1 lak ryngkat ka trophy, katba ka Sohryngkham ka la ïohpdiang ïa ka khusnam pisa kaba Rs 50,000, kum ka kynhun ba wan ba-ar (Runners-Up).
Nalor ki kynhun, la sam ruh ïa ki khusnam shimet sha ki rangïalehkai ba kynsai, ha kaba Donboklang Lyngdoh jong ka Mawpat, u la khur ïa ka khusnam Top Scorer da kaba thep 12 tylli ki kol, bad ïa ka nam Player of the Final la khur da u Reform Pale, uba dei ruh jong ka Mawpat.
