Kynmaw burom ka USTM da ka ‘Mayabini Tribute’ ha ka lyngkhuh sngi ïap ba nyngkong u Zubeen Garg

Shillong, Nailur 19 : Ka University of Science and Technology Meghalaya (USTM) ha ka Sngi Saitjaiñ ka la pynlong ïa ka ‘Mayabini Tribute’ ban kynmaw burom ïa u nongrwai ba pawnam, u Zubeen Garg, ha ka sngi rakhe kaba nyngkong ïa ka jingdap shi snem naduh ka jingkhlad jong u, kaba la rakhe kum ka Zubeen Diwas.
La pynlong ïa ka jingïalang kynmaw burom ha Gyan Circle hapoh ka campus, ha kaba ka USTM baroh kawei kynthup ïa u Chancellor Mahbubul Hoque, u Pro Vice Chancellor Padma Shri Sarbeswar Sahariah, u Director, Medical Administration, PIMC Prof. A C Kataki, ki nonghikai kiba rangbah, ki doktor bad kumba 6,000 ngut ki samla pule ki la ïalum ban ai burom ïa une u nongrwai ba pawnam.
Ka prokram ka la sdang da ka jingbuh syntiew ha Gyan Circle, bud sa ka jingïalang ba kyrpang lyngba ki prokram bapher bapher.
Haba kren ha ka jingïalang, u Chancellor Mahbubul Hoque u la pynkynmaw ïa ka jingïadei kaba kyrpang jong u Zubeen bad ka USTM. U la kdew ba ka skulbah ka la ai ïa u ïa ka Honorary Doctor of Letters (D.Litt.) ha ka 10th Convocation jong ka skulbah ha ka 27 tarik Nailar, 2024, namar ka jingnoh synñiang kaba khraw jong u sha ka kam pynneh pynsah ïa ka kolshor, ki kam jingïarap paidbah, ka jingsuk, ka jingïatylli bad ka roi ka par jong ka imlang sahlang.
“U Zubeen Garg u la don ka jingïadei kaba kordor bad kaba kyrpang bad ka USTM,” ong u Hoque.
Ka prokram ka la kut da ka jingïakynmaw lang jong ka ïing USTM baroh kawei ïa u Zubeen Garg kum u nongrwai bad nongpynneh ïa ka kolshor uba ka sur bad ka jingrwai jong u ka la jam palat ïa ki pud bad ka la long ka bynta kaba kongsan jong ka jingithuh ïa ka kolshor jong ka thain shatei lam-mihngi jong ka ri baroh kawei.