Bitar ka FKJGP ba pynsahteng ki ar sorkar halor u pud u sam ka thaiñ Langpih

Nongstoiñ, Nailur 18: Ka Federation of Khasi Jaiñtia & Garo People Rimuliang Circle mynta ka sngi 18 tarik Nailur 2026, ha ka jingïalang ha Langpih ka la pynpaw ïa ka jingsngewkhia bad sngew bitar ïa ka jingïaipynsahteng jong ki ar tylli ki Sorkar Meghalaya bad Assam, ban pyndep noh kloi ïa ka mat ïakren pynbeit pud.
U Bah Serbilin Lyngdoh President FKJGP Ri Muliang Circle haba kren sha ki lad pathai khubor hadien ka jingïalang, u la ong, “Ka jingïai pynsahteng ïa kane ka mat ka la wanrah shibun ki jingeh hapoh ka dong ka thaiñ hi baroh kawei. Dang ha kane ka taïew ba la dep ki briew ka Assam ryngkat ki pyrton pulit, ki la bteng ban pyndik bad pyntriem ïa ki paidbah nongshong shnong ha ka thaiñ”.
“Na ka liang ka seng ngi pynrem jur ïa ka jingwan leh don bor jong ka Assam, ha kaba ka la wan kem ïa ki nongtrei bylla kiba trei ïa ka Building jong ka Aganwadi Centre ha Noapara ba la ïoh na ka scheme sorkar jong ka jylla Meghalaya”.
“Ngi pynrem jur ruh ïa ka jingwan pynsangeh ïa ka jingtrei ïa ka Health Sub-Centre ha Kompaduli. Nangta jingwan pynthud ïa ki SHG kiba rep Sohtrun ha ka Shnong Borkhuli, kaba la jia ha ka sngi 17 tarik mynta u bnai. Kine ki jingïaiwan pynthud jong ka Assam ïa ki briew jong ka thaiñ, ka pyni ïa ka jingbym kheiñ snep jong ka Sorkar Assam ïa ka mon laitluid jong ki paidbah nongshong shnong”, u la ong.
“Ngi dawa jur ba ka Sorkar Meghalaya ba ka dei ban ai jingïadei ïa ki paidbah nongshong shnong ha ka thaiñ bad pyntikna ba kitei ki Developement Scheme ha Noapara Kompaduli bad Borkhuli kim dei ban sangeh. Hynrei, ki dei ban ïaid beit shakhmat bad lada ka sorkar kam lah ban pynïaid shaphrang ïa kitei ki project, ka la dei ka por ba ngin hap mih pyrshah ban nym shah shuh ïa ka Assam ruh ba kan wan pyntrei ïa kino kino ki project hapoh ka thaiñ”, u la ong.