Shillong, Nailur 18: Ka Laitkor ka la ïoh ban khur pura ïa ki lai point da kaba pynliem da 2-1 ïa ka Sawmer hynne ka sngi Thohdieng ha ka lympung Shillong Premier League 2026, ha SSA Stadium.
U Hamingbert Nongbet (18’, 63’) u la thep ïa baroh ar tylli ki kol jong ka Laitkor ha baroh ar tylli ki kylla, katba u Bickyson Kharkongor (38’) u la pynïakhaid shipor na ka bynta ka Sawmer.
Ka Sawmer kan jin da la kyntiew ïa lade sha ka kyrdan ba ha khlieh duh lada ka jop ïa ka jingïakhun hynne ka sngi, hynrei namar ka jingshah rem ka la ïaineh ha ka kyrdan ba saw da 9 poiñ. Katba ka Laitkor ka la kyntiew ïa ka jingkheiñ jong ka sha ka 6 poiñ, hynrei kane ruh kam pat biang ïa ki ban kiew shabar na ka thup kyrdan shah sloit lane relegation zone bad ka dang ïaineh ha ka kyrdan ba khyndai, watla mynta ka duna da tang shi poiñ ban ïaryngkat bad ki saw tylli ki kynhun kiba ïakhaid mar 7 poiñ.
Haba phai sha ka jingïalehkai, ka kol ba nyngkong ka la urlong na ka bol pashat jong u Balajiedlang Lyngwa, ha kaba u Hamingbert u la pynïasoh tiak da ka khlieh ban phah ïa ka bol sha kol.
Nangta ka Sawmer, hadien katto katne ki kabu kiba kam shym la lah ban pynurlong ka la ïoh ba kan pynkhihjar lyngba u Bickyson ha ka minit kaba 38, kaba pynlong ïa ka kylla step ban ïakhaid mar 1-1.
Haba wanphai sha ka kylla miet, ka la Laitkor ka la shimpor 20 minit ba kan thep ïa ka namtam, kaba sa shi sien la thep biang da u Hamingbert.
Ka SPL 2026 kan wanphai biang ha ka sngi Nyngkong, ha kaba ka Mylliem kaba wan shatrai duh jong ka miej, kan aireng pyrshah ïa ka Meghalaya Police kaba wan kyrdan ba hynñiew, ha ka por 3 baje nohphai sngi.
