Hadien ba ki MLA ki la pan jingmut na ki paidbah bad yn phah shwa da ka showcause notice

Shillong, Nailur 17 : Ka United Democratic Party (UDP) ka la pynkhreh ban shim da ki sienjam kiba kham tyngeh pyrshah ïa phra ngut ki MLA jong ka seng kiba la mih ban pynpaw paidbah ïa ka jingthmu ban leit pynïasoh bad ka BJP.
Haba pynpaw ïa kane ha ki lad pathai khubor ha kane ka sngi Palei, u General Secretary ka UDP, Bah Titos W Chyne u la ong ba ka sienjam kaba nyngkong ba kin leh ka long ban pan jingpynshai (showcause) shwa na kitei baroh.
Na ka liang u General Secretary ka party u la ong ruh ba ka Disciplinary Committee bad ka State Parliamentary Board kin sa shong pyrkhat halor kine ki jingjia baroh ha shwa ba kan shim ïa kino kino ki rai.
Haba la kylli lada ka jingsospon ïa ki MLA na ka party ka lah ban long kawei na ki sienjam, ka jubab kaba u Bah Titos u ai ka long ba ïa mynta hi um pat lah ban ong ei ei.
“Ngam lah ban shim rai marwei. Kum ka party, ngi hap ban shim lang ïa ka rai,” u la ong.
Nangta, u la ong ruh ba ka party ka lah ban pan jingpynshai ne shim ïa kiwei pat ki sienjam, hynrei ka rai khatduh kan shong ha ka jingïalang jong ka State Parliamentary Board.
“Ngam lah ban ong eiei mynta. Lehse ngin ai jingthoh ban pan jingpynshai ne shim ïa kiwei pat ki sienjam, hynrei ngam lah ban ong eiei kaba thikna mynta, namar ka State Parliamentary Board ka hap ban shong jingïalang ban shim ïa ka rai,” u la ong.
Ha kajuh ka por, u la pynshai ba ki phra ngut ki MLA ki dang long ki dkhot jong ka UDP, namar kim pat mih noh na ka seng haduh mynta.
“Baroh ki dang don bad ka party namar haduh mynta kim pat mih,” u la ong.
Haba la kylli halor ki daw kiba pynmih ïa ka jingïakynad ha ka party haduh ba kan da poi haduh une u pud, u Bah Titos u la ong ba don bun ki daw, hynrei u la kyntait ba ka daw kadei baroh namar ka kam nongïalam.
“Don bun ki mat, hynrei ngam lah ban pynpaw ïa ki. Hynrei kam don jingïadei bad ka jingïalam ka seng; don kiwei pat ki daw,” u la ong.
Haba la kylli lada kane ka jingleh jong ki MLA kadei namar ka jingmyntoi ha ka saiñpyrthei, ka jubab kaba u ai ka long, “Kata ka dei ka jingjied shimet jong ki.”
Ha kajuh ka por u la pynshai da kaba ong, “Haduh mynta, kum ka seng, ngi dang ïatylli. Wat la ki khubor ki phriang ba don ki MLA ban pynïasoh bad ka BJP, kata kam mut ba ka seng hi ka pynïasoh bad ka BJP,” u la ong.