Shillong, Nailur 14 : Ka Meghalaya Board of School Education (MBOSE) ha ka sngi Nyngkong ka la pynbna ïa ka tarik jong ka eksamin jong ka Secondary School Leaving Certificate (SSLC) 2026-27.
Kane ka eksamin kan sdang ha 4 tarik Nohprah bad kan kut ha 16 tarik Nohprah. Kane ka eksamin kan long man ka sngi naduh 10 baje mynstep haduh 1 baje nohphaisngi, la pyntip u Director bad Controller of Examinations ka MBOSE, u Bah T.R. Laloo.
Katkum ka jingpyntip, ka English kan long ha 4 tarik Nohprah, ka Science and Technology ha 7 tarik, ka Indian Languages/Additional English ha 9 tarik, bad ka Health & Physical Education, Computer Science bad Vocational Subjects ha 11 tarik Nohprah.
Ka Social Science kan long ha 14 tarik Nohprah, katba ka Mathematics/Special Mathematics kan long ha 16 tarik Nohprah.
Ki ktien kiba ki samla pule ki lah ban jied ki kynthup ïa Khasi, Garo, Hindi, Bengali, Assamese, Nepali, Urdu bad Mizo.
Shuh shuh la pyntp ba ki vocational subjects ki kynthup ïa Beauty and Wellness, Tourism, Health Care, Electronics, Agriculture, ITES, Apparels, Plumbing, Food Processing, Telecom, Banking bad Automobile.
Ka MBOSE ka la pyntip ba ki examination hall kin plie ha 9:30 baje mynstep. Ki question paper yn sam ha 9:45 baje, bad ki answer script yn sam ha 9:50 baje bad ba ka jingthoh eksam kan sdang thik ha ka por 10 baje mynstep.
Na bynta ki vocational subjects, ka theory exam kan long shi kynta, kata naduh 10 baje haduh 11 baje mynstep.
Ka Board ka la ong ruh ba kane ka jingpynbna ka lah ban kylla lada mih kino kino ki jingjia kiba ym lah ban khmih lynti, lane lada don ki jingpynbna kiba kongsan na ka Sorkar jylla ne ka Sorkar Pdeng.
