U ai sngewbha ïa ka ïingsorkar jong u ban ïohshong ki nongdie madan, ong u CM ïa u Bah Sniawbhalang Dhar

Shillong, Nailur 14 : U Myntri Rangbah ka jylla, Conrad K Sangma ha ka sngi Nyngkong u la ong ba ka rai jong ka sorkar ban pynkynriah ïa ki nongdie paidbah sha Dhankheti bad Barik ka dei ka sienjam kaba biang tam bad kaba myntoi ïa baroh, kaba pynïahap lang ïa ka jingpynitynnad ïa ka nongbah bad ka jingshngaiñ jong ka kamai kajih.
Ïa kane u Myntri Rangbah u la pynpaw hadien ba u la dep ban sam ïa ki song jingïarap pisa sha ki nongdie madan kiba la pynkynriah sha Brightwell Bungalow.
U Myntri Rangbah u la kdew kyrpang ïa u Symbud Myntri uba peit ïaka tnad Urban Affairs namar ba u la iehnoh ïa ka ïing sah sorkar jong u na bynta ban ïoh pyndonkam ki nongdie madan.
“Ka jaka ha kaba ngi ïeng mynta, ka Brightwell Bungalow, ka dei ka bungalow sorkar jong u Myntri ba peit ïa ki kam Urban Affairs. Ka jingïoh kamai jong ki paidbah jong ngi ka kham kongsan ïa ngi bad namarkata, watla ka mut ba u Myntri un hap ban iehnoh ïa ka bungalow sorkar jong u na bynta ki nongdie madan jong ngi, hynrei u la leh ïa kata. Nga ai khublei ïa u namar ka jingsbun mynsiem jong u,” ong u Conrad.
U la ong ba ki jaka sorkar kiba kongsan ha kylleng ka nongbah mynta la ai sha ki nongdie paidbah, khnang ban pynlong ïa ki surok kiba lah ban ïaid kjat bad kiba khuid, khlem da ktah ïa ka jingïoh kamai jong ki.
Ha kane ka sngi la synran lang ïa u Myntri Rangbah da u Myntri ka sorkar ka jylla Bah Sanbor Shullai bad Chief Adviser jong ka Sorkar bad MLA ka East Shillong Dr. Ampareen Lyngdoh
Da kaba ai jingïaroh ïa ka jingïatreilang jong baroh ki nongshim bynta, u Myntri Rangbah u la ong “Nga kwah ban ai khublei ïa ka municipal bad ka urban department bad ïa ki MLA jong ngi bad ïa ki nongdie madan jong ngi namar ba ki la pynlong ïa kane kumba ka long mynta. Kane kan ym long kaba lah lada ym don ka jingïatreilang jong uwei pa uwei u nongshim bynta.”
“Kane ka lah ban paw kum ka sienjam kaba rit bad kaba suk, hynrei kane ka dei kawei na ki jingeh kiba kham khraw tam kiba ngi la ïakynduh. Kam dei tang kaba ïadei bad ka roi ka par, hynrei ka ïadei beit bad ka jingïoh kamai jong ki briew bad ruh bad ka jingpynitynnad ïa ka nongbah baroh kawei,” u la ong.
Da kaba kyntu ïa ki paidbah ban kyrshan ïa ki nongdie kiba la pynkynriah sha ka jaka ba thymmai, u Myntri Rangbah u la ong, “Baroh ki samla pule jong ngi, ki nongwan jngohkai bad ki nongshong shnong ki dei ban wan jngoh ïa kine ki jaka die. Ka dei ka jingmad kaba pher. Ka la long kum ka imlang sahlang kaba rit bad ka kynhun kaba rit kaba trei lang na bynta ka jingïoh kamai jong ki man la ka sngi.”
U la ong ba ka sorkar ka thmu ban kyntiew bad pynbha shuh shuh ïa ki jaka die da kaba pynlong ïa ki jingrwai live ha ka por janmiet, ban pynbiang ïa ki painkhana, ki ben ba skhem bad ki jingshai pynitynnad, khnang ban shah ïa ka iew ïadie ïa thied haduh hadien 7-8 baje janmiet katkum ki por kiba la shah.
“Kane ka dei ka sienjam kaba don jingïadei bad ka histori. Ngi la pyrshang ban leh ïa kane la slem, hynrei ka long ka bynta kaba eh bha. Ha kaba kut, ngi la lah ban pynurlong ïa ka ha kaba ym don mano mano uba duh bad baroh ki ïoh jingmyntoi,” bynrap biang u Myntri Rangbah.
Kum ka jingïarap kaba kyrpang, ka sorkar ka ai T.20,000 sha uwei pa uwei u nongdie kaba kynthup mar T.10,000 kum ka jingïarap kaba kyrkieh kaba yn thep beit sha ka account jong u, bad T.2,000 man la u bnai hadien kata, u la bynrap.