Hakhmat u CM leit kynduh ki nongtrei sorkar ba sahkut sah ka Meghalaya ha ka 5th Pay Commission

Shillong, Nailur 14 : Ka Meghalaya State Government Employees Federation kaba dei ka kynhun jong ki nongtrei sorkar ha ka sngi Nyngkong ka la leit ban kynduh ïa u Myntri Rangbah ka jylla, u Conrad K. Sangma ban dawa ban pynkylla noh mardor ïa ka jingsiew jong ki nongtrei Sorkar kaba la sahkut sah mynta ha ka 5th Pay Commission.
“Ngi la aiti ïa ka memorandum ban pynbeit bad pyntreikam ïa ka jingsiew kaba thymmai na bynta ki nongtrei Sorkar,” la ong ka Secretary General jong ka Federation, ka B Kharshandi, hadien ka jingïakynduh ïa u Myntri Rangbah.
Ka la ong ba ka Sorkar Pdeng ka la dep pynkylla ïa ka jingsiew jong ki nongtrei jong ka, hynrei ka Meghalaya ka dang sahdien.
“Ka Sorkar Pdeng ka la dep pynkylla ïa ka jingsiew jong ki nongtrei jong ka. Ngi kwah ba u Myntri Rangbah un peit bniah ïa kane bad ai ïa ka jingsiew kaba thymmai ïa ki nongtrei Sorkar jylla,” ka la ong.
Ka Kong Kharshandi ka la ong ba ki nongtrei Sorkar ka jylla ki la duh arsien ka jingkyntiew tulop thymmai.
“Ka jingpynkylla kaba khatduh jong ngi ka long ha 2017, hynrei ngi la duh ha 2006… bad ngi la duh biang ha 2016. Ka Sorkar Pdeng ka ju pynkylla ïa ka jingsiew man la ka 10 snem, hynrei ngi la mad ïa ka jingduh kaba khraw,” ka la ong.
“Ngi dang sah ha ka 5th Pay Commission. Wat ha ka Thaiñ Shatei Lam Mihngi, ki jylla ki la leit sha ka 7th Pay bad mynta ki khmih lynti ïa ka 8th Pay. Ka Meghalaya ka dang sah ha ka 5th Pay Commission,” ka la bynrap.
Ka Kong Kharshandi ka la ong ba u Myntri Rangbah u la kular ban peit bniah ïa kane ka mat.
“Mynta ka shong ha ka Sorkar ban shimkhia ïa kane. Ngi kwah ba ka Sorkar kan pyrkhat bha bad shimkhia ïa ka jingdawa jong ngi,” la bynrap biang ka Secretary General.