Mar ïa dep pynïasoh BJP ki MLA ka UDP yn bteng pynïasoh ki nongïalam na ki 12 distrik : Bah AL Hek

Shillong, Nailur 13 : Ka BJP ka la plie lad ïa ki briew kiba kwah ban rung sha ka seng, bad lah ban don shuh shuh ki nongïalam kiba na baroh ki 12 district jong ka Meghalaya kiba rung sha ka BJP, la ong u nongïalam rangbah ka BJP bad MLA ka Pynthorumkhrah, Bah AL Hek, ha ka Sngi Saitjaiñ.
U Bah Hek u la pynthikna ruh ba ka BJP ka dang ïakren bad ki phra ngut ki MLA jong ka UDP halor ka jingrung jong ki sha ka BJP.
“Ngi peit ïa ki jingkylla ha ka saiñpyrthei na ka bynta u snem 2028. Nga la ïathuh lypa ba ngi la ïakren ïa kane bad u Home Minister Amit Shah. Ngi la ïathuh ïa u ba ha u snem 2028 ngin thaw sorkar ha Meghalaya,” ong u Bah Hek haba kren sha ki nongthoh khubor.
Haba kylli halor ka khubor ba phra ngut ki MLA ka UDP ki dang pyrshang ban rung sha ka BJP, u Hek u la ong ba ka rai kaba khatduh kan wan na Delhi.
“Ka rai kan shim da ki nongïalam ka seng ha ka ri. Nga thikna ba kin rung, hynrei ka rai kaba khatduh kan wan na ki nongïalam ha ka ri. Kiei kiei ki lah ban jia ha kano kano ka sngi,” u la ong.
“Ngam len ïa kane. Ka jingïakren ka la don lypa, kumta ka sngi ka jingïapher kam jngai shuh,” u la bynrap.
Haba kylli lada ka BJP ka la pdiang ïa ki jingdawa jong kine ki MLA, u Bah Hek u la ong ba ka rai kaba khatduh ka shong ha ki nongïalam ka BJP ha Delhi, ym ha ki nongïalam ka jylla.
“Nga ïathuh ïa phi, ka rai kan shim da ki nongïalam ha ka ri, ym da ki nongïalam ka jylla. Ngam ong ba baroh ki jingdawa ki la dep pdiang, hynrei ki la ïoh ïa ka jubab kaba bha. Kane kam dei tang ka jingdawa jong ka UDP, hynrei ka dei ka jingdawa jong ki paidbah ka Meghalaya. Ngi don hangne ban ïakhun na ka bynta ka bha ka miat jong ka jylla bad ki paidbah,” u la ong.
U Bah Hek u la ong ba ka BJP ka dang ïakren bad ki nongïalam na ki bynta bapher bapher jong ka Meghalaya, ym tang na Khasi Hills ne na ka UDP.
“Ym dei tang na Khasi Hills. Bun ki briew ki la wan ïakren bad ngi, bad ki la wan ïakren bad nga ruh, na ki seng saiñpyrthei bapher bapher, hynrei ngan ym ïathuh na kano ka seng ki wan. Ki MLA kiba dang don ha ka kam bad ki MLA barim na ki 12 district jong ka Meghalaya ki dang wan sha ka BJP,” u la ong.
U la ong ruh ba kine ki nongïalam ki dang shim por ban rai.
“Ki dang shim ïa la ka por. Kumba u Bah Jemino Mawthoh u la shim ïa la ka por, ki ruh ki dang shim ïa la ka por,” ong u Bah Hek.
Haba kylli lada ki nongïalam na ka NPP bad TMC ruh ki dang pynkhreh ban rung sha ka BJP, u Bah Hek u la jubab, “Bun ki nongïalam, kynthup ïa ki MLA kiba dang don ha ka kam bad ki MLA barim.”