Nongstoiñ, Nailur 10: Ka Voice of the Peoples Party State Youth Wing, ha ka jingïalam jong I Bah Rishan Nongrum bad Bah Robert Wahlang, ryngkat bad ka jingïadonlang ki nongïalam jong ka VPP Eastern West Khasi Hills District, mynta ka sngi 10 tarik Nailur, ki la leit ban ïakynduh ïa ka Deputy Commissioner jong ka Eastern West halor ka jingpynlong ïa ka District Selection Committee exam thung kam jong ka District ka ban long ha ka 12 tarik mynta u bnai.
Ka daw ka jingleit ïakynduh kyrpang ka dei hadien ba bun ki Samla na Eastern West Khasi Hills ki la wan kyrpad ïa ka Party, ban ïakren bad ka ophis DC Eastern West Khasi Hills, namar ka jingïatyngkhuh ha kajuh ka sngi bad ka exam ba pynïaid da ka MPSC.
Ka Seng ha ka jingïakynduh ka la kyrpad ïa DC ban pynkynriah noh ïa ka sngi pynlong exam jong ka DSC, khnang ban ai lad ïa ki Samla ban ïoh ïaleh lang ïa ka eksam MPSC.
Ha kane ka jingïakynduh I DC I la ïathuh ba ka por ka la lyngkot palat ban pynkynriah bad ki don ruh ki samla ba ïaleh eksam kiba lah wan lypa naduh na jngai bad kan shem jingeh ban pynkynriah ïa ka tarik.
Da kaba pdiang ïa kane ka jingïathuh DC, ka Seng ka la ai jingmut ruh ba nangne shakhmat naduh ka MPSC, ki DSC bad baroh ki shnat ba pynïaid ïa ki exam thung kam, ki dei ban da kynjoh ktien lang shwa ban buh ïa ki tarik eksam, khnang ban nym ïatyngkhuh ïa kajuh ka sngi namar kan ktah bha ïa ki samla wad kam kiba kwah ban ïa leh baroh ki exam.
Ka Seng ka kyrpad ruh ïa ki samla wadkam lada jia ba tyngkhuh kum kine, kim dei ban pyntip dier por, hynrei dei ban pyntip ha ka por kaba kylluid, khnang ba kan ym ktah ïa ki nongpynïaid ïa ki exam kumjuh ïa ki samla wad kam.
