Haduh 110 tylli ki Sub Centre la tei ha ki arsnem bad sa 200 tylli yn pyndep hapoh u Lber 2027

Shillong, Nailur 09 : Ka sorkar Meghalaya ka la pynlut kumba 750 klur tyngka ha ki jingdonkam ka koit ka khiah ha kine ki san snem ba la dep lyngba ki lad bapher bapher, ong u Myntri Rangbah ka Jylla Conrad K Sangma ha ka sngi Balang hadien ba u la bishar bniah ïa ka tnad ka koit ka khiah.
Ha kane ka jingïalang u Myntri Rangbah u la bishar bniah ïa ka jingpyntrei ïa ki Sub Centre, Primary Health Centres, Community Health Centre bad ki projek hospital kiba dang pyntrei ha baroh ki district jong ka jylla.
U Conrad u la pyntip ba palat 110 tylli ki Sub Centre la dep ban pyndep ha kine ki ar snem ba la dep bad mynta ki don sa kumba 200 tylli ki Sub Centre la buh ban pyndep haduh u Lber 2027, kaba pynlong ïa ka jingdon baroh ki Sub Centres ha ka jylla ban poi sha 700 tylli.
Kane ka jingpynbun ka long ban wanrah ïa ka jingshakri koit ka khiah ba nyngkong hajan ki paidbah, khamtam ha ki thaiñ nongkyndong bad ki jaka kiba eh ban poi.
U Myntri Rangbah u la ong shuh shuh ba ki kam pynbha bad ki jingtei thymmai ïa ki jaka sumar ha bun ki jaka sumar, kynthup ïa Bajengdoba, Byrnihat, Mahendraganj, Raksamgre bad Mylliem Umthlong, ki la jan dep.
Ka sorkar ka thmu ban pynlong ïa kine ki jaka sumar kiba la dep ban ïoh sdang treikam ha u Kyllalyngkot 2027. La kdew ba wat ka hospital kaba don 100 tylli ki jingthiah ha Resubelpara ruh yn pynlong ban treikam kloi katba lah.
Haba kheiñ lang, ki kam pynbha bad ki jingtei thymmai kiba dang ïaid kin pynbun sa palat 600 tylli ki jingthiah, nalor ki kumba 7,000 tylli ki jingthiah kiba don mynta ha ki jaka sumar jong ka sorkar, u la ong.
U Myntri Rangbah u la ong ba kine ki jingbei tyngka ki la wanrah ïa ka jingbha ha ka koit ka khiah. Katkum ka report kaba dang shen – Meghalaya’s Health Trends: Progress and Priorities – ka jingïap jong ki khunlung ha ka jylla ka la hiar da kumba 40 percent ha kine ki san snem ba la dep, na 3,064 ha u snem 2020-21 sha 1,833 ha u snem 2025-26, katba ka jingïap jong ki kmie ka la hiar da kumba 57 percent ha kajuh ka por.
Da kaba kdew ïa ka National Family Health Survey (NFHS-6, 2023-24), u Myntri Rangbah u la ong ba ka jingleit kha khun ha ki jaka sumar ka la kiew na 51.4 percent ha NFHS-4 sha 65.6 percent bad shuh shuh sha 79 percent ha 2025-26.
La ong ruh ba ka jingai tika ïa ki khunlung baroh ka la kiew na 63.8 percent sha 75.3 percent, bad ka jingdon jong ki longïing kiba don ka health insurance ka la kiew na 34.6 percent sha 74.9 percent, kaba kham eh wat ïa kaba don ha ka ri baroh kawei.