Ai jingtip ka Sorkar sha ka ïingbishar ba la pynsangeh ïa ki kam ka Shree Cement Ltd

Shillong, Nailur 8 : Ka Sorkar Jylla kala pyntip sha ka ïing Bishar High Court ba kala pynsangeh lut ïa baroh ki kam bad jingtreikam jong ka Shree Cement ha East Jaintia Hills kat bym pat pyndep ka Fact-Finding Committee ïa ka jingtohkit.
Ha ka affidavit ba la aiti sha ka division bench ka Chief Justice Revati Mohite Dere bad Justice W Diengdoh ha ka PIL ba la mudui da ka Jaintia Students’ Union (JSU), ka Commissioner bad Secretary ka tnad Pohïing (Political) kong Rosetta Mary Kurbah kala ïathuh ba ïa kane ka rai la shim ha ka jingïa lang ba long ha ka 26 tarik Nailar bad ki kynhun ba don bynta kynthup ka Khasi Students’ Union.
Ka affidavit ka ong ba ka Committee kan long kaba laitluid, ka ban khlieh da u Ophisar ba la rim haka kam, bad kan bishar ïa ki mat bala pynsngew da ka KSU ha ka dorkhas ba ïadei bad ka mariang, ka imlang sahlang, ka kam aiñ bad ki kam bymman.
“Ka Fact-Finding Committee kan wanrah ïa ka jingshai kaba bniah halor kane ka kam” ong ka affidavit.
Ka Sorkar ka ong ba ki Pulit bad ki bor district kin pynthikna ba ym dei ban don kano kano ka jingjia ha kane ka por ba ïaid ka jingtohkit.
Ka nongmudui kala aiti ruh sa kawei ka affidavit ha ryngkat ki dur bad u pen drive ba kynnoh pynkheiñ aiñ ki briew Sorkar. Ka Jylla kala pan por ban jubab ïa kane.ïa kane ka mukotduma yn sa shong bishar biang ha ka 29 tarik Nailur.