Amlarem, Nailur 08: Ïa ka prokram ai jinghikai halor ka Co-operative Audit, Accounts and Computerisation jong ka Primary Agricultural Credit Societies (PACS) la pynlong mynta ka sngi ha Amlarem Sub-Division West Jaiñtia Hills District.
La sdang ïa kane ka prokram da ka jingkren ai khublei na u ma W. Pariat, Sub-Registrar of Co-operative Societies (SRCS), Amlarem, uba la pdiang sngewbha ïa ki Resource Person bad ki nongwan ïashim bynta baroh.
Haba ai jingkren ha kane ka jingïalang, u ma S. T. Blah, Senior Co-operative Officer ula pynpaw ia ka jingdonkam jong ka jingkheiñ jingdiah kaba biang haka jingtreikam kaba paka jong ki Co-operative Society. Ula pynpaw ba ka jingbuh ïa ki jingkheiñ ïa ka pisa kaba biang ka pynthikna ïa ka jinglong kaba shai bad kaba thikna ha kaba pynïaid ïa ka jingmih bad ka jingpynlut jong kawei ka Society.
Shuh shuh u la ban jur ba ki jingkheiñ jingdiah, ki receipts, ki voucher, ki kot ki sla jong ki bank bad ki audit report ki long kiba donkam bha na ka bynta ki Society ban ïoh ïa ki jingmyntoi hapoh ki skhim bad ki grant bapher bapher jong ka Sorkar.
Ula batai ruh ïa ki jingmut ba kongsan jong ka jingkheiñ jingdiah kum ka Income, Asset, Debit bad Credit bad ka jingdonkam jong ki haka jingpynïaid bad jingroi kaba paka jong ki Co-operative Society.
Haba kren shaphang ka PACS Computerisation, ka Nisha Suchiang kaba dei ka System Integrator for PACS Computerisation, BASIN, Jowai ka la batai ba ka jingpyndonkam da ka kor computer ka kynthup kaba rukom pynkylla na ka jingbuh jingthoh da ka kti sha ka digital system ban pynbha ïa ka jingtreikam bad ban pynduna ïa ki jingbakla.
Kala ban jur ïa ka jingdonkam ban don ïa ki kaiphod bad ki jingthoh ba biang jong ka jingpeit bniah shwa ban pynrung ïa ki jingtip ha ka ERP system bad ka la pynpaw ïa ka jingdonkam ban don ka bording kaba biang bad ka jingpynïasoh ïa ka internet na ka bynta ka jingtreikam kaba suk jong ka system ba la pyndonkam da ka kor computer.
U Bah Pynshaitbor Thongni uba dei u Accountant ka Meghalaya Co-operative Apex Bank (MCAB), Amlarem ruh ula ai jingkren sha ki nongshim bynta ha kane ka prokram. La pynkut ïa ka prokram da ka kyntien ai khublei na ka T. Kharumnuid, SCO, Amlarem.
