Pdiang sngewbha ka JNC ïa ka Fact Finding Committee halor ka jingjia ha Lum Syrman bad Daistong

Shillong, Nailur 07 : Ka Jaintia National Council (JNC) ka la pdiang sngewbha ïa ka rai jong ka Sorkar Meghalaya ban thaw ïa ka Fact-Finding Committee kaban bishar bniah ïa ki jingsngew kiba mih haba ïadei bad ka projek jong ka Shree Cement kaba la tyrwa ha Lum Syrman bad Daistong.
Ha ka dorkhas sha u Myntri Rangbah ka Jylla Conrad K Sangma ha ka sngi Nyngkong na ka liang u President ka JNC, u Sambormi Lyngdoh, u la ai jingïaroh ïa ka sienjam jong ka sorkar ban pynneh ïa ka kam kumba ka long (status quo) bad ban pynsangeh shipor ïa ki kam kiba ïadei bad ka projek tad haduh ban da dep ka jingtohkit.
“Kane ka long ka sienjam kaba kongsan bad kaba ai jingshaniah na ka liang ka sorkar ban wanrah biang ka jingshaniah jong ki paidbah ban pynbeit ïa kane ka kam,” u la ong.
Ha kajuh ka por u ong ba kum ka seng ka kyntu ba ïa ka jingtohkit kam dei ban kut tang halor ka public hearing kaba long ha ka 31tarik Naitung na bynta ka projek ha Lum Syrman hynrei ba kan peit lang ruh ïa kiwei ki bynta kiba don jingïadei bad katei ka jingjia.
Shuh shuh u la ong ruh ba ha ki jingïakren bad ki shithi kiba la dep phah mynshwa ki la pynpaw lypa ïa ki jingsngewkhia kiba ïadei bad ka jinglong trai ïa ka khyndew, ka jingbym don ka jingmynjur, ka jingktah ïa ka rep ka riang bad ka jingïoh kamai, kumjuh ruh ka jingïada ïa kiba shah ktah.
Kumta, u ong ba ka JNC ka la kyrpad ïa ka Committee ban bishar bniah ïa ka jinglong jong ki trai jaka jong ki ar tylli ki Elaka kiba don jingïadei ha Lum Syrman.
Ka Council ka la dawa ruh ba ka jingbishar dei ban kynthup ïa ka shnong Daistong kaba don ïa ka kompeni kaban peit ïa ka jingsngewkhia jong ki trai jaka bad ki nongshong shnong kiba ïadei bad ka jingpyndonkam ïa ka jaka bad kumjuh ka jingktah ïa ka jingïoh kamai.
Ha kajuh ka por ka JNC ka la kyrpad ïa ka Sorkar ban pyrkhat ban kynthup ïa u MLA jong ka thaiñ bad ïa ki Executive Member jong ka Jaintia Hills Autonomous District Council (JHADC) kiba peit ïa ka Elaka Nongkhlieh bad Elaka Sutnga, kum ki dkhot.
“Ïa kane ka jingkyrpad ym shym la leh ban pynduna ïa ka jinglong laitluid jong ka jingtohkit, hynrei ban pynthikna ba ka Committee kan ïoh jingïarap kaba biang na ki briew kiba tip bha ïa ka rukom synshar tynrai bad ka rukom bat khyndew ha ka thaiñ,” la ong ka seng.
Ka JNC ka la ai jingmut ruh ba ka Committee ka dei ban leit jurip sha Lum Syrman bad Daistong bad ban ïakynduh markhmat bad ki trai jaka, ki nongrep, ki bor synshar shnong bad kumjuh ïa ki seng kynthei.