Shillong, Nailur 07: Ka Meghalaya Football Association (MFA) ka la thung ïa u H Standly (ba la tip lyngkot da u Stanley) Rozario kum u head coach jong ka hashwa ka National Games 2027, kaba ka Meghalaya kan pynlong.
U Rozario un wanrah bad u ïa ka jingshemphang kaba bun ha kane ka kam, kynthup ïa ka jingtip kaba bñiah shaphang ka kam ban trei ha ka thaiñ shatei lammihngi.
U la long coach ïa ka Shillong Lajong FC ha ka jingïalehkai ba nyngkong jong ka ha ka I-League ha u snem 2009-10 bad kumjuh ruh ha ka Federation Cup jong katei ka samoi, ha kaba ka Lajong ka la pyndep ha ka kyrdan ba ar. Ha ki snem kiba bud u Rozario u la treilang bad ka United Sikkim FC bad ka Aizawl FC.
U Stanley uba la ïoh ïa ka AFC Pro License, u la long ruh u coach jong ka East Bengal, Mohun Bagan bad Salgaocar, nalor kiwei pat ki klob ba pawnam, kumjuh ruh ïa ka kynhun phutbol ki shipai Indian Army/Services. Hapdeng u snem 2006 bad 2008 u la long ruh u assistant coach jong ka kynhun ïalehkai ba la rangbah ki shynrang jong ka India hapoh ka jingïalam jong u Bob Houghton.
Kumba ka paw ka sorkar Meghalaya ka la pynshlur ïa ki synjuk ïalehkai jong ka jylla ban wanrah ïa kaba bha tam jong ki sha khmat ha ka National Games, da kaba kyrshan ïa ki jingtei, ki tiar ïalehkai na ka bynta ki synjuk bapher bapher. Ka jingkyrmen ka long kaba khraw ba ka jylla Meghalaya kan lah ban wanrah ïa ka burom ïa ki nongshong shnong ka jylla ha ka jingïalehkai ba ki ieit eh – ka phutbol.
Ka MFA ka la thrang ban jied ïa u coach uba don ka jingshemphang bad uba la pynshisha ïa ka jinglah ban ïatreilang bad ki nongïalehkai ba dang samla bad hadien ka jingwad bñiah, ka synjuk ka la poi sha ka jingïamynjur bad u Stanley Rozario.
