Ïamir jingmut ka MBSG ïa ka jingdonkam ban pynneh sumar ïa ka mariang naba kylla ka suiñ bneng

Shillong, Nailur 06: Ka Meghalaya Bharat Scouts and Guides (MBSG), Shillong ka la pynlong ïa ka jingïamir jingmut halor ka “National Level Integrated Workshop on Mission Life” bad kumno ban ïada ïalade, ïa kane ka jingïalang kaba san sngi la sdang ha ka 01/Nailur/2026 bad la pynkut ha ka sngi Saitjaiñ.
Kiba la wan ban ïashim bynta ha kane ka jingïalang kaba san sngi ki don 70 ngut na kylleng ka Ri India, ka phang pdeng jong kane ka jingïalang ka long ba kumno ban ïada ha kane ka juk jong ka jingïaleh bad ban pynneh ïa ka mariang.
Ka jingïakren ka long ba kumno ban ïaleh ban pynneh pynsah ïa ka mariang naduh ki bor sorkar kiba ha khlieh duh ban wanrah ïa ki polisi bad kane kan poi sha ki briew kiba don ha ki shnong ki thaw bad ba shimet shimet ban don ïa ka jingkitkhlieh.
Na ka liang u Bah S. Syiem u heh ophisar ka tnad Pollution Board ula ong ba donkam ban wanrah ïa ka jingkylla ban pynneh pynsah ïa ka mariang ha kane ka por jong ka jingkylla ka suiñ bneng, ka jingduna ki tyllong um bad ka jingbret pathar ïa ki plastik.
La kyntu ïa kiba wan ïashim bynta ha kane ka jingïalang ba kin sdang nalade kumno ban ïaleh ban ïada ïa ka mariang bad da ki nuksa kaba ki pyni kan khring ïa kiwei ban pynneh pynsah ïa ka mariang da ki kam kiba man ka sngi bad manla ka por.