Ka jingpharep kulmar khlem ki sakhi sabut, ka jingkem ïa ki samla kan ktah ïa ka burom ka ijot jong ki

Ka Meghalaya High Court, ka la tangon tyngeh ïa ki pulit jong ka nongbah Shillong, halor ka jingïadei bad ka jingkulmar kaba la jia ha ka 19 tarik Nailar 2026, kaba dei ka sngi jong ka jingïaid paidbah ka seng ki samla pule, Khasi Students Union (KSU), da ki ar shaka ne ki thuk thuk.
Lah ban pynkynmaw, ba katei ka jingïaid paidbah, ka dei ruh, kaba la ïoh jingmynjur, na ka ophis jong U Deputy Commissioner, East Khasi hills bad kumta ki don ruh ki kyndon kiba bthah halor katei ka jingïaid paidbah.
Hadien katei ka jingjia, la kem nyngkong eh ïa ki lai ngut ki nongïalam ba rangbah jong ka seng KSU bad katei ka jingkem, ka lah ban long halor kiba bun ki daw, hynrei ban shim ba kitei ki laingut, ki dei kiba leit lun maw ïa ki kali, kiba leit thang ïa ki kali sorkar, ka dei ka mat kaba eh bha ban ïatai bad kan dang shim por ïa ki kyndon aiñ, ba kin tih bniah.
Hadien ka jingshah tangon ha ka High Court, ka la mih sa kawei ka jingjia, kaba i biej shibun ha ka sngi palei ba ladep, ha kaba ki arngut ki dkhot ka KSU, ki shah khot hajir, halor ka jingleit ujor jong ki, ïa ka jingtei temple ha ophis ka CBI ha Mawdiangdiang; hynrei kaba lyngngoh, ka long ba ynda poi ha thanat, la pynkylla noh ïa ka jingtohkit bad la pynngat sha ka 19 tarik Nailar bad kaba nang pyni biej shuh shuh, ka long ba ïa uwei u dkhot, u bym don bynta ha katei ka jingkulmar kaba 19 tarik, la shu khot hajir bad tohkit khlem daw bad sa pyllait dier por bad khlem sabut eiei ruh em.
Kine ki jingjia la imat, kumba kin pynthohbria bha ïa ka rukom tohkit jong ki pulit Shillong, ha kaba kim shym la lap satia ïa kiba donkti ha ki kam pyntriem bad kumta kim banse ban leit kem bikar ïa ki laingut ki nongïalam ba ha khlieh bad lait nangta, ki leit pharep sa ïa ki bym don bynta eiei ruh em bad katei ka dei ka jingleh kaba sniew shibun, namar ka shu buh dak sniew noh ïa ki samla kiba dang khie dang san bad ki ban long ki païa ba skhem jong ka jaitbynriew ha ki por ki ban sa wan.
Ka por, ka la nang ïaid stet bad katei ka jingkulmar na ka jingïaid thuk thuk, ka don mynta la lai taïew eiei bad kumta kaba donkam, ka long ba ki bor pulit, kin ïit bniah ïa ki jingshisha, lada ki don bad ba kin ai ïa ka jingtohkit kaba dei hok bad kaba khlem shah pynbor ne shah liang bad ba kiba leh beaiñ, ki dei ban shah tian bishar, hynrei ym da kaba shu pharep ruma khlem daw ïa ki khun samla ka ri.
Ka jingjia jong ka 19 tarik Nailar, ka la poi sha ka jingtohkit jong ka Meghalaya High Court bad ki bor pulit jong ka East Khasi hills, ki donkam ban pynbiang ïa baroh ki sabut ha ki kti jongki, namar lada kim don ïa ki sakhi kiba biang, kumta ka jingtohkit kan sa shu pulom ei khamakha.
Lah ban ïohi ruh ba ki jingtohkit kumba ka long mynta ka lah ban long pynban ruh ïa ki jingma kiba khraw khamtam eh ïa ki paidbah, ki nongshong shnong, ki nongsynshar shnong bad kumjuh ruh ïa ki riew shimet ba lehse ki kwah ban ujor ïa kaei kaei kaba long pyrshah ïa ka imlang sahlang ne kiba long beaiñ ki lah pynban ban shah pynjynjar da kaba shu shah khot hajir ei khamakha bad manla ka por, kumba la ïohi ïa ki Nongïalam jong ka seng Khasi Students Union Nongmynsong kiba la ujor halor ka jingtei ïa ka jaka treikam jong ka CBI ha Mawdiangdiang bad jin da la dei ba ki la pynjulor ne leit leh da kano kano ka kam ba kham tyngeh lei ym tip shuh kaei ka ban sa jia ïa ki.
Kumta kum kine ki jingshah pharep jong ki khun samla, shah pynbudnam bad kiwei kiwei pat ki jingshah pynlehraiñ hakhmat jong ki bor jong aiñ kan ktah shisha ïa ka long rynïeng bad ka burom ka iktiar jong ki khun samla, khamtam eh shu buh lada jia ïa kito kiba dang iaid lynti ha ki jingpule bad kiwei kiwei pat ki kam ban tei ïa ka imlang sahlang bad ïa ka jylla bad ka ri baroh kawei.
Shuh shuh lah ban ong ba bun na ki samla ha kine ki sngi ki sngew ba kane ka jingleh jong ka sorkar kan pynduh mynsiem khamtam lada ki pynmih ne ki pynpaw ïa kino kino ki jingujor ne ki jingbym sngew ïahab naba ha kine ki sngi hadien ba ki la ïohi ba kane ka jingleh jong ka sorkar tang na ka daw ba don kiba ujor ne kiba pynpaw ka jingbym sngew ïahap ïa ki jingïaid ki kam kiba long kiba beaiñ kan wanrah pynban ka jingtieng jing bym shong shngaiñ ïa ka lawei jong ki.