Leit jurip ki Nongïalam Shnong ïa ka Jingkieng Lailad, dawa na ka bor District ban tehlakam ïa ki Trok ba kit tam pud ba la synjor ka Jingkieng

Nongpoh, Naitung 28: Ki ar tylli ki Dorbar Shnong jong ka Shnong Umsohma, Lailad bad ka Dorbar Shnong Umlyngkdait New Tasku ki la pynpaw ka jingsngewkhia kaba jur halor ka jingbteng ki kali ba kit tam pud ban ïaid na ka Jingkieng ha Lailad,, kaba la buh jingma na ka daw ba katei ka Jingkieng ka la sator bad don jingma ba ka lah ban dkut ne khyllem noh ha kano kano ka por.

               Halor kane ka jingbteng ki Kali ba kit tam pud palat ïa ka 9 ton kumba la buh da ka sorkar, ki nongïalam Shnong ka Shnoing Umsohma, Lailad bad ka Shnong Umlyngkdait New Tasku mynta ka sngi ki la leit ban jurip bad sakhi ruh ba ki don ki Kali ba kit tam pud ba ïaid na jrong katei ka Jingkieng kaba la buh jingma shisha ïa katei ka Jingkieng.

               Kum ban pynkynmaw, wat ka tnad PWD bad ka bor District ki la dep ban mana bad ban khang pyrshah ïa ka jingïaid ki Kali ba kit tam pud na katei ka Jingkieng, hynrei kumba long haduh mynta kiba bun ki Kali ba kit tam pud ki ju ïaid na katei ka Jingkieng kaba la buh jijngma shisha ba ioh katei ka Jingkieng kan khyllem ne kan dkut noh.

               Kumba la lap bad sakhi ruh ha kane ka jingleit jurip kitei ki nongïalam shnong ba la ïalam da u Rangbah Shnong ka Umsohma, Lailad, u Bah Shembok Mawphñiang bad u Rangbah Shnong ka Umlyngkdait, New Tasku, u bah Edwin Syngkli la lap ba kat dang mih ki sngi katei ka jingkieng ka la dang sator bad don ki dak ki shin ba ka la buh jingma shisha ban ïaid ki Kali ba la kit tam pud bad kum ki nongïalam ruh ki la pynpaw ka jingsngewkhia ba kam shym la don kano kano ka jingtehlakam ïa kum kine ki Kali ba kit tam pud ba ïaid na katei ka Jingkieng ha Lailad.

               Namarkata, ban shngaiñ ki paidbah ha ka leit ka wan bad ban nym mih kano kano ka jingjia ba sngewsih na ka jingsynjor kane ka Jingkieng kaba la lah ban ktah ïa kiba bun ki shnong ha Western Ri Bhoi, kitei ki nongïalam Shnong ki la buh ka jingkyrpad ïa ka tnad PWD bad kumjuh ruh ïa ka bor synshar District ka Ri Bhoi ba kin shim khia ban tehlakam na kine ki kali ne ki trok ba kit tam pud khnang ba kan nym buh jingma ïa katei ka Jingkieng kaba la sator bad don jingma.