Lada ngi pynpulom ïa ki khynnah mynta, ngin sa mad ïa kiba pynkheiñ aiñ hadien habud: CJM

Shillong, Nailur 03: Ka Juvenile Justice Committee jong ka High Court Meghalaya, ha ka jingïatreilang bad ka tnat Social Welfare bad ka tnat ka Koit ka Khiah ha ka sngi Palei ka la pynlong ïa ka jingïasyllok ne ka State-Level Multi-Stakeholder Consultation halor ka pang “Juvenile Justice (Care and Protection of Children) Act, 2015: A Decade of Implementation and the Way Forward” hapoh Auditorium jong ka High Court Meghalaya.
Haba kren ha ka jingïalang ka Chief Justice High Court Meghalaya (CJM), ka Hon’ble Justice Revati Mohite Dere, ka la ong ka jingïasyllok kam da dei than ka jingbishar halor ka Juvenile Justice Act hynrei kumjuh ruh ka lad ban khmih ïa ka jingangnud ka imlang sahlang ban ïatreilang halor ka jingeh ki khynnah.
“Mynta ngi pynleit jingmut halor ka Juvenile Justice Act ha kine ki phew snem ba la leit bad la ïakren ïa ki lynti ban ïaid shakhmat. Kane ka jingïalang kam dei tang ka jingbishar halor ki kyndon aiñ, hynrei ka jingkheiñ halor ki jingpyrkhat jong ngi. Ngi don hangne ban bishar ïa ki jingkular jong ngi ïa ki khynnah,” ka la ong.
Ka Justice Dere ka la ong ba ïa ka aiñ la pyntreikam ban pynthikna ba ki khynnah ba tyngkhuh bad ka aiñ kin shah sumar kum ki khynnah ba donkam ki jingkylla bad ki jingsumar ha ka jaka ba ki runar kiba donkam ki jingshah pynshitom, katba ki khynnah kiba donkam ki jingsumar bad jingïada ki ïoh da ki jingkyrshan kiba kongsan halor ka jingshngaiñ ka lawei jong ki.
Ka la pynshai ruh halor ki jingkylla jong ki hok da kaba ong ba donkam ka jingpynleit jingmut halor ka jingsngewthuh ïa ki jingjia ba lam sha u ne ka khynnah ban leh ïa ka kam kaba bakla ha ka jaka ban pynleit jingmut halor ka jingbakla.
Ha kawei pat ka liang ka Justice Dere ka la ong ki dang bun ki jingïakhun kiba dang sah, kynthup ka jingpynslem ka jingpynbna ïa ka rta ha ki jingtohkit, ka jinglong ka jingsumar ha ki khynnah ha ki jaka sumar ki khynnah, ka jingduna ki jingïatreilang hapdeng ki tnat, ki jingpyndonkam bakla hapdeng ki khynnah ba ïatyngkhuh bad ka aiñ, bad ka jingdonkam ban pynbha ki lad jingtei bad kiwei kiwei.
Ka la khot ka jingdonkam ka jingïatreilang hapdeng ki pulit, ka tnat pule puthi, ka koit ka khiah, ka labour bad kiwei ki tnat ban pynbeit ïa kine ki kam kum ka jingpep skul shiteng por, ka jingkoit jingkhiah ha ka bor pyrkhat, ka jingpyndonkam bakla ïa ki jingdih pynbuaid bad ka jingbylla ki khynnah.
Ka khot ïa ka jingdonkam ban don ka jingkhmih bniah ba manla ka por bad ka jingïasyllok hapdeng ki Juvenile Justice Boards bad Child Welfare Committee.
“Lada ngi pulom ïa u khynnah mynta, ngin sa mad bad kynduh ïa kiba pynkheiñ aiñ hadien habud,” ka la ong, bad khot ïa baroh ban ïatreilang ban pynthikna ki lad sumar, ki jingïada, ki jingai jingsumar bad ka lawei ba bha na ka bynta ki khynnah.
Ha kane ka sngi la ïoh ruh ki jingkren na u Hon’ble Justice H. S. Thangkhiew, Judge of the High Court bad Meghalaya-cum-Chairperson ka Juvenile Justice Committee, High Court ka Meghalaya, bad na u Additional Chief Secretary Sampath Kumar, IAS, bad kiwei kiwei.
Kiwei kiba la donlang ki long u Hon’ble Justice B. Bhattacharjee, Judge ka High Court Meghalaya, ka Saloni Verma, IAS, Director, Social Welfare, Dr. Neela E. Kharsahnoh, Director of Health Services (MI), ki ophisar na ki tnat bapher bapher bad kiwei kiba la shah khot sngewbha.