Ha ki 61 tylli ki snem ka Synod ka la sei ïa ki riewshemphang batei ïa ka ri bad jylla: Bah Balajied

Shillong, Nailur 03: Ka synod college Shillong kaba lah dei ka College kaba ïoh ïa ka kyrdan A+ da ka NAAC, Bengaluru, ha ka sngi Palei ka la pynlong ïa ka Graduation Day ban ithuh bad pynkup burom ïa kumba 427 ngut ki samla pule kiba la pyndep ïa ka Graduate na kane ka College bad kumjuh ruh ïa ki samla pule kiba kyrpang eh na ki tnat bapher kiba la wanrah burom bad ïoh ki kyrdan ba shakhmat lyngba ki marks ha ki subject bapher bapher.
Ha kane ka prokram u MLA ka UDP na Shella Constituency bad uba dei ruh u Chairman ka State Law Commission ka jylla u Bah Balajied Synrem u la long u kongsan, ha ka jingïadonlang u Principal u Dr. M Rani, kiwei pat ki professor, ki nonghikai, ki nongtrei ka college, bad kiwei kiwei kiba la shah khot sngewbha.
Haba kren kum u kongsan u Bah Synrem u la pynpaw ka jingkhublei ba ka college kaba la ïaid la 61 tylli ki snem ka la sei bun ki riew shemphang, ki riew shakri ïa ka imlang sahlang bad kumjuh ruh kiba tei ïa ka imlang sahlang, ka jylla bad ka ri baroh kawei.
Haba ai mynsiem ïa ki samla pule kiba la dep ïa ka jingpule graduate, u la ong ba kim dei ban duh jingkyrmen lada ym lah ban poi sha ka kyrdan kaba kham shalor ne wat ba hap ban ïaleh ïa ki Back Subject hynrei ban bteng ïa ka jingpule tat haduh ban poi ki kyrdan ba shalor
U la batai ruh ïa ka jingïapher ka pule Puthi kaba mynshwa ha kaba bun ki samla pule ki ju pep ka leit class hynrei la kmen pat tang ban pass, katba kane ka juk ka la pher bad ki samla pule ki la pynleit jingmut wat haba don ki jingkylla ba bun bad dei halor kane kaba pynlong ïa kane ka thaiñ shatei lammihngi ruh ba kan kiew bad bna kum ka Pdeng ka pule puthi bad u kyrmen ruh ba ka Synod college ha kawei ka Sngi yn sa mih ki riew ba la shah jied kyrpang ban kren na ka bynta ka jylla.
Ha kane ka sngi ka la don shwa ka jingïalum lang ki samla pule ha Basketball Court, nangta ka jingïaid paidbah sha Dinam Hall, ka jingrwai ïa ka National Anthem, ka jingkren pdiang na u Principal u Dr. M Rani, ka jingpule ïa ka Bible bad jingduwai bad kiwei kiwei pat ki prokram.
Ha kane ka prokram u kongsan u la pynkup burom ïa ki samla pule kiba wan shakhmat ha ki subjek bapher bapher, ba kynthup ruh ïa u Principal u Dr M Rani uba la sam ruh ïa ki khusnam bad syrnot ïa ki samla pyndep ka kyrdan Graduate.
Ïa ki khusnam ba kyrpang la ai sha ki samla pule da ka jingithuh da ka Primrose Gatphoh Memorial Award, ka Dr. D. Wanswett Award bad ka Thomas Jones Memorial Award.