Ban pynkylla ïa ka Presidential Order u snem 1950 : Ka sorkar kan sa leit ïa kren bad u Myntri Rangbahduh bad ka President jong ka ri

Shillong, Nailur 01: U State President jong ka National People Party (NPP) uba dei ruh u Symbud Myntri Rangbah ka jylla u la ong ba ka Sorkar Meghalaya Democratic Alliance (MDA) kan sa leit ïakren bad ka Sorkar Pdeng ban pynkylla noh ïa ka Presidential Order u snem 1950 bad ban bishar thymmai ïa ka thup ki Schedules Tribe ha Meghalaya.
U Bah Prestone u la pynpaw ïa kane hadien ka jingshah pynkup burom ha ki nongtrei ka party hadien ka jinglah jong ka sorkar ban mynjur da ka resolution ban khang pyrshah ïa ka jingtih ïa u Uranium ha Meghalaya bad kumjuh ruh halor ka jinglah ban pynlong official language ïa ka ktien Khasi bad Garo.
Kane ka jingshah pynkup burom kadei ruh ka sngi seng ba 14 snem jong ka NPP bad ka jingrakhe sngi kha jong u Nongseng ka party (L) Purno A Sangma.
U Bah Prestone ula pyntip ba ka Sorkar Jylla kala shim ïa ka rai kaba khraw bha ha u bnai bala lah ban “peit biang ïa ka tynrai” jong ka Jylla.
Haba ngi ong ba ka Meghalaya ka dei ka Jylla riewlum, ngi pynshong nongrim ïa ka halor ka Presidential Notification u snem 1950.Hynniewphew-hynriew snem kala ïaid.Ngi la thaw mynta ia ka Committee, kaba ma nga hi nga khlieh, ban peit biang bad shong bisahr ia ka thup ki riewlum bad ki riewlum bynrap ha Meghalaya bad ban bishar mano ba dei hok bad mano ki bym dei, ula ong.
Haba pynkynmaw ïa ka jingiakynad pher jaidbynriew ha Mizoram ha ka por jong u Bah D.D.Lapang kum u Myntri Rangbah ka Jylla bad ma u kum u MLA ba dang shah jied nyngkong, u Bah Prestone ula ong ba bun ki paid Khasi-Pnar kiba sah ha Mizoram kila shah ktah jur.
“Nga iohsngew ïa ka jingpang met bad jingsngew mong.Ki dei ki riewlum kum ma ngi.Ha Meghalaya, ngi burom bad ithuh ïa ki riewlum Mizo bad ai ïa kijuh ki jingmyntoi ïa ki na kajuh ka pliang.Ha kajuh ka por, Nga iakynduh ïa u Myntri ka Mizoram bad kylli ïa u-lada ki briew jong phi ha Meghalaya ki lah ban ïabam na kajuh ka pliang, balei ba ki briew jong ngi kim lah ban iohlang hangtei” ong u bah Prestone.
U Dy CM ula ong ba dei halor kane ka nongrim bala thaw mynta ïa ka Committee.
Haba pan ïa ka jingkyrshan, u bah Prestone ula ong ba ka party kan pyntyllun shakhmat ïa kane ka kam kat kum ka lynti ka ain bad ka riti synshar ka ri.
Lada donkam, ka Sorkar baroh kawei kan leit ïakynduh ïa u Myntri Rangbah Duh bad ka President jong ka ri ba kin pynkylla ïa ka notification u snem 1950. Kane ka dei halor ka jingwanrah ïa ka jingkylla khnang ba ki paid Khasi, Jaintia bad Garo kin nang khlain, ula ong.
U Bah Prestone ula ong ba ym pat ju don ki Sorkar ha ki 76 snem bala leit noh ki ban nud ban leh eiei halor kane ka kam.