Pyndonburom ïa u CM, ki Dy.CM namar ka rai rangbah jong ki

Shillong, Nailar 01: Ka National People Party (NPP) ha ka lyngkhuh sngi seng ba 14 ïa ka party bad kaba dei ruh ka sngi kha u (L) Purno A Sangma, kala pynkup burom kyrpang ïa u Myntri Rangbah ka jylla bad kumjuh ruh ïa ki ar ngut ki Symbud Myntri Rangbah namar ba kila trei ïa ka kam ba radbah na ka bynta ka jaitbynriew baroh.
Na ka liang u Working President jong ka NPP u Bah Hamlet Dohling haba mait phang ïa kane ka sngi u la ong kane ka prokram ba ïa kynduh mynta ka sngi kan dei ka prokram ban sah kynmaw pateng la pakit ïa ka party ha kaba ïa lum lang mynta ka sngi ban pyndon burom ïa u Conrad K Sangma uba dei u Myntri Rangbah, ki Symbud Myntri Rangbah u Bah Prestone Tynsong bad u Bah Sniawbhalang Dhar.
Kum ka party naduh ka parent body, ka NPWF, NPYF bad baroh ki dkhot ngi dei ban sngewsarong bad ngi dei ban ai ka jingkyrshan bad kri kamon bad kti kadiang namar ba kila trei ïa ka kam kaba radbah na ka bynta ka jaitbynriew hi baroh kawei, ong u Bah Dohling.
Kane ka sngi ba ngi pyndon burom ïa ki ka long ha ki ar tylli kii mat ki jura kiba ka party NPP kaba lam khmat ïa ka sorkar kala leh na ka bynta ka jaitbynriew bad ïa ka jylla Meghalaya baroh kawei u la ong.
“Kaba nyngkong ka long ba ka la wanrah da ka official resolution hapoh ka ïingdorbar thaw aiñ ban pyrshah ïa ka jingthmu tih ïa u Uranium ha kane ka ri ka jong ngi bad kaba pat dei ban pass ïa ka Meghalaya Languages Amenment Bill 2026, kine ki ar tylli kidei ki mar ki ban pynmyntoi ym tang ïa ka pateng ba mynta hynrei ïa ka pateng ban sa wan” ong u Bah Hamlet.
Na ka liang u National Vice President ka NPP u Bah Sniawbhalang Dhar u la ong, “Ka party NPP ka pher na kiwei pat ki party, ka jingshah kawang maw ka jingshah bom ha u slap bad u phria haduh ba ym tip shuh na sha kamon bad na sha ka diang hynrei ngi ïeng skhem na ka bynta ki paidbah ba ïeit jong ka jylla Meghalaya”.
Hapoh ka jingïalam u Conrad bad u Bah Prestone hapoh jong ka party ngim ju don ka jingïa pher jingmut, hooid kam dei kaba suk ban shim ïa kum kine ki rai hynrei ka NPP kadei ka party kaba ju sngap ïa ka jingong u paidbah, u la ong.
“Don kiba ong ba kane ka party kaba tieng eit, kane ka party mar ïa dawa mar ïa ioh hynrei kane baroh ngi donbok ba ngi don ki nongialam ba iohi jngai na ka bynta ka lawei ka jong ngi bad ngim ju ran dien ïa ka jingshisha bad ngim ju lehrain ruh ban pynbeit thymmai lada ngi dei ban pynthymmai na ka bynta ka jingbha jong ki paidbah” ong u Bah Sniawbhalang.