Ka jingïatreilang bad ka BJP ka long na ka bynta ka roi ka par hynrei ïapher ki nongrim treikam: National Vice President NPP

Shillong, Nailar 30 : Ka NPP bad ka BJP ki don ki jingmut jingpyrkhat kiba pher, bad ka jingïatreilang jong ki ka long tang na ka bynta ka roi ka par, la ong u National Vice President ka NPP bad Symbud Myntri Rangbah ka Jylla, Bah Sniawbhalang Dhar ha ka Sngi Saitjaiñ.
Haba kren ha ka jingïalang jingïalap elekshon ha Lawbyrtun, Mawthadraishan, na ka bynta u kyrtong MP ha ka elekshon MP shiteng samoi, Dr. DRL Nonglait, na ka liang u Bah Sniawbhalang u la ong ba ki paidbah kim dei ban shah pynkulmar jingmut halor kane ka bynta.
“Ka BJP ka don la ka jong ka nongrim treikam, ka NPP ruh ka don la ka jong ka nongrim treikam. Kumta kine baroh ki la ïapher kawei na kawei pat. Haba ngi trei lang bad ka BJP, ka long na ka bynta ka roi ka par, ym na ka bynta kano kano pat. Ka dei ban don ka jingshaniah ha ka sorkar pdeng ban wanrah ïa ka roi ka par,” u la ong.
U la ong ba ki nongpyrshah ki pyndonkam bakla ïa ki jinglui lui jong ki paidbah ban pynbiej ïa ki.
“Man ka por halor kane, ki briew jong ngi ki shah pynbiej, ki pynkulmar ïa phi. Ki shim kabu ïa ka jinglui lui jongphi. Dei ban pynsaphriang ïa kane ka khubor sha ki thaiñ kiba ki paidbah ki donkam ban ïoh jingshai,” u la ong.
Haba pynshai ba ka jingkyrshan ne ka jingïatreilang bad kawei pat ka party kam mut ba yn kylla sha kata ka party, u Bah Sniawbhalang u la ong, “Lada u Dr. Nonglait u dei u Presbyterian bad ki Catholic ki thep vote na ka bynta jong u, kata ka mut ba phi kylla niam? Kumjuh ruh, lada ngi trei lang bad ka BJP, kam mut ba ngin kylla long BJP.”
U la bynrap ba ka kamram jong ki nongthep vote ka long ban jied ïa ki nongïalam, hynrei ka kamram jong ki nongmihkhmat kiba la jied ka long ban pynthikna ïa ka jingmyntoi bad ka roi ka par jong ka thain.