Lah ban pra phum ka UDP khreh pynïasoh ki MLA 8 ngut sha ka BJP bad 2 ngut sha ka NPP

Shillong, Nailar 29 : Ka United Democratic Party (UDP) kaba dei kawei na ki Seng Riewlum kaba la rim ha ka jylla ka lah ban pra phum ha kane ka kynti namar la ïoh jingtip ba ki don 8 ngut ki MLA jongka kiba khreh pynïasoh sha ka BJP bad 2 ngut sha ka NPP.
La ïoh jingtip ba ka jingïapynbeit ka la ïaid shakhmat mynta ha nongbah Delhi hapdeng ki MLA ka UDP bad ki Nongïalam ka BJP. Wat u Myntri Rangbah ka Assam u Himanta Biswa Sarma ruh u ïadon lang bad kine ki MLA sha Delhi iathuh ka khubor.
Ki bym pat shim kano kano ka rai kat haduh ba thoh ïa kane ka khubor ki dei sa tang u President bah Metbah Lyngdoh, u Working President u bah Paul Lyngdoh bad u Myntri ka tnad pule puthi u ma Lahkmen Rymbui.
Haba pyrshang ban ïakren bad u bah Paul Lyngdoh halor kane ka jingkhreh pynïasoh sha ka BJP ne NPP na ka liang jong u bah Paul u la ong “ Halor kane ngam pat shim ïa kano kano ruh ka rai namar nga dang ïamir jingmut bad twad jingmut shwa na ki Nongïalam bad ki Nongkyrshan jongka West Shillong Constituency bad dei tad hadien kata nga lah ban shim ïa kano kano ka rai da ka jingmynjur lang jongki”.
La ïoh jingtip ba ka jingïapynbeit ka long ruh na ka bynta ka jingïabhah ïïa ka shuki Myntri hapdeng kine kiba pynïasoh sha ka BJP bad NPP namar la ïoh jingtip ba kane ka jingthmu leit pynïasoh ruh ka dei na ka bynta ka shuki myntri sorkar hi.