Shillong, Nailar 27 : Ka Sorkar Jylla lyngba ka ophis u Executive Director, State Disaster Management Authority, Meghalaya, Shillong la pyntip ba hadien ka jingshlei um bad ka jingtwa khyndew kaba jur kaba la jia ha Nepal ha ka 26 tarik Nailar 2026, ka la phah wad jingtip ïoh don ki briew na Meghalaya kiba lah ban jah ne kiba ym lah ban lap shuh ïa ki.
Kane ka jingjia ha Rasuwa District, hajan u pud Nepal–Tibet, ka la pynjulor jur ïa ki shnong, ki surok, ki jingkieng bad kiwei kiwei ki jingtei ha kaba bun ki briew ki la jah ne ym lah shuh ban lap ïa ki.
Ka State Disaster Management Authority, Meghalaya, ka kyrpad ïa ki bahaïing, ki paralok, ki travel agency, ki tour operator bad ki paidbah kiba don jingtip shaphang kino kino ki briew na Meghalaya kiba lah ban shah ktah ha kane ka jingjia ba ki dei ban pyntip mar dor ha kine ki number Dedicated Helpline – 6009924512; Emergency – 112 / 1070 bad lyngba ka CM Connect – 1971.
Ha ka por la kyntu ban ai ïa ka kyrteng bad ka rta jong u/ka briew, nombor phone, address ha Meghalaya, ka jaka ba khatduh ba la tip ïa u/ka briew ha Nepal, ka tarik bad ka por ba khatduh la ïakren, bad ka kyrteng bad contact details jong u/ka bahaïing ne nongpyntip.
La ïathuh ba ïa ki jingtip yn lum bad phah sha ki bor ba dei peit na ka bynta ban pynshisha bad ban ai jingïarap kaba donkam.
