Seisoh ka jingïakren ka KSU bad Sorkar 70 % ki mat jingdawa ki la treikam: Lambokstar

Shillong, Nailar 26 : Ka jingïakren hapdeng ka Khasi Students’ Union (KSU) bad ka Sorkar mynta ka janmiet ka long kaba seisoh namar wat la ym pat treikam 100 na ka 100% ruh hynrei kumba 70% ki mat jingdawa ki la treikam ong u President ba rim ka KSU u Samla Lambokstar Marngar haba ïakren bad ki Lad Pathai khubor. Tangba u la ong pat ruh ba ka seng kan ap 2 bnai ba ka sorkar kan pyntreikam pura ïa ki rai ba la shim mynta ka sngi.
U Samla Lambokstar u la ïathuh ha kaba ïadei bad ka mat jingdawa kaba nyngkong kata ban pyndam noh ïa ka Jingsngap Paidbah halor ka kam tih mawshun ka Shree Cement, U Myntri Rangbah ka jylla u Conrad K Sangma ul a ïathuh ba la dep thung ïa ka Fact Finding Committee (FFC) ban wad bniah halor kane ka jingsngap paidbah bad kaei kaba la jia ha ka 31 tarik Naitung ha East Jaintia Hills kaba dei katei ka sngi ba pynlong ïa ka jingsngap paidbah namar la kynnoh ba ka don ka jingleh thok leh shukor.
Halor kane ula ïathuh ba ka Sorkar ka la mynjur ïa ka jingdawa ka Seng ban ym pat shah treikam ïa ka Shree Cement katba ym pat dep ka jingtohkit bniah jong katei ka Committee. Halor ka jingdawa ban pynshitom ïa u DC bad SP ka East Jaintia Hills, ki Pulit Ophisar ka District ki heh jongka Meghalaya State Pollution Control Board u samla Lambokstar u la ong ba ki shaniah ha ka jingstad jongka sorkar tangba la dep pynthikna ba kim don bynta ei ei ruh bad katei ka Fact Finding Committee (FFC) namar katei ka Committee ka long laitluid beit ban tohkit marwei.
Halor ka jingpyntreikam pura ïa ka Meghalaya Residents Safety and Security Act 2016 u la ïathuh ba ka sorkar ka la mynjur ïa kane ruh bad shen yn sa plie noh ïaka Facilitation Centre ha Umling bad Ratacherra kumjuh ruh ha Athiabari ha kaba ki briew na ki bor pulit, Labour, Tourism, Education kin ïadon lang ban pynsted ïa ka jingtreikam. La mynjur ruh ba hashwa ban plie ïa kine ki Facilitation Centre yn sa leit jurip lang ka Sorkar bad KSU ïa kitei ki jaka. La buh por ba la kumno kumno ia kine ki jaka yn plie noh shwa ka Khristmas.
Halor ka MRSSAB kaba dang sahkut bad ka sorkar pdeng u la ïathuh ba ka Sorkar jylla ka la ïakren bad ka sorkar pdeng ban mynjur ïa katei ka aiñ bad ka Sorkar Pdeng ka la pan jingmut katto katne ki kyndon jingpynshai na ka sorkar jylla bad ïa kane ruh la dep phah biang sha ka sorkar pdeng bad la kyrmen ba kan sa ai ka jingmynjur hynrei katba ym pat ïoh ïa katei ruh ka MRSSA 16 kan treikam noh.
Halor ka jingpyntreikam ïa ka Meghalaya Migrant Workmen Act 2020 ka sorkar ka la dep mynjur ïa kane ruh ban tynsat ruh ïa ki katto katne ki kyndon na ka Work Permit ha katei ka kyndon aiñ. Nalor kata la rai ruh ba ïa kane ka kyndon aiñ yn pyntreikam noh hapoh 15 sngi. Halor ka jingdawa thung kam ha NEIGRIHMS ka Seng ka sngewthuh ba katei ka shong ha ka sorkar pdeng bad na ka liang u Myntri Rangbah ula dep ïathuh ba la dep pynpoi ïa ka shithi ka Seng sha u Myntri ka tnad ka koit ka khiah jongka sorkar pdeng bad la mynjur ruh ba u Myntri Rangbah un ïakren bad pynbeit tarik bad u Myntri ka tnad ka koit ka khiah jongka sorkar pdeng khnang ban ïoh leit ïa kynduh lang bad pynpaw hakhmat jongu da ki Nongïalam ka KSU lem bad ka Sorkar jylla.
Na ka bynta ban pyndam noh ïa ka Personal Interview ha ki Post Grade B, C bad D la dep mynjur ban ym don personal interview shuh ha ka Post Grade C bad D katba na ka bynta ka B ka jingbishar bniah ka dang ïaid shakhmat. La mynjur ruh ba ka jingthung kam ka dei ban long kaba khuid ba suba naduh ka MPSC haduh ki DSC khnang ba kiba dei hok ban ioh kin ioh.