Jowai, Nailar 25: Ka Khasi Student Union (KSU) Kupli Area Circle kala kyntu naka ophis u Assistant Executive Engineer Shangpung Distribution Sub-Division (MePDCL) West Jaiñtia Hills District ban maramot noh mardor ïaki post light 33 kv kiba la khyllem hajan ka shnong Lakadong naduh ka 22 tarik u Nailar.
Ka seng kala leit ban jurip biang ïa kane ka jingujor ki post light kiba la don haduh 10 ne 11 tylli kiba la khyllem, haduh bala pynlong ïa ki 18 tylli ki shnong jong katei ka thaiñ Lakadong shawah ter ter ban shong haka jingdum. Dang haka 24 tarik ka seng kala dep ban buh jingthoh sha u EE Shangpung, hynrei ula ïoh jubab pynban ba ka tnad kam don satia ïa ki tiar ki tar bad la hap ban wanrah na shabar.
Hynrei mynta ka sngi Balang ki dkhot ka seng kila leit biang sha katei ka jaka ba khyllem ki post bad kitei ki post light ki dang sah kumjuh khlem don satia ka jingmaramot kaba la pynlong ïa katei ka shnong ban shong dung khlem bording la jan dap shitaïew.
La pynsngew kane ka jingduh light kala bun jingeh ïa ki khynnah pule kiba pynkhreh ïa ki examination bala jan ka por bad kumjuh ruh ka ktah ïaki ophis sorkar hapoh katei ka thaiñ naduh ka tnad pulit, ki jaka sumar bad kiwei de ki tnad treikam kaba la pynthuh ïa ki kam ki jam jong ki.
Halor kane ka jingduh light la jan dap taïew ka KSU Kupli Area Circle kala buh jingkylli kat ka MeECL Sub Division kam don tiar ban maramot ïa kitei ki post bad ki sainar, lada kumne ka donkam aiu ïa katei ka tnad ban don ha Shangpung ladei ban pynduh pyndam noh shi syndon ïaka.
Shuh shuh ka seng kala kynthoh lada dei ba duh light da ki company kharkhana tang hapoh shi kynta la dep ban maramot hynrei balei pat ïa ka tnad MeECL ka leh kled ïa ki thaiñ nongkyndong kumne la buh jingkylli ki nongïalam ka KSU Kupli Area Circle kumthup ïa President samla Balawantei Suchiang bad u General Secretary samla Leikirichard Tyngkan.
