Jowai: U Deputy Commissioner ka West Jaiñtia Hills District u la pynmih ïa ka hukum ban khang pyrshah bad pynduna ïa ka jingjyllei jong ka jingshet jingshet harud surok, ka jingbret pathar ïa ki jaboh jabaiñ khlem da kheiñ snep, kum sha ki jaka jngohkai, ki rud surok bad ki jaka paidbah.
Kane ka hukum ka khang pyrshah ban shet jingshet harud surok, kynthup ïa ka jingpyndonkam ïa ki dieng thang, u rnga, ki tyndong LPG, lane kino kino ki jingthangding ha ki bynta rud surok, ki jaka peitkai bad ki jaka paidbah.
La khang pyrshah ruh ban bret jaboh bad bret pathar ïa ki plastic, ki jingbam ba la tam, ki bilor, ki tin, ki pla thep jingbam, lane kino kino kiwei pat ki jait jaboh bad kumjuh la khang ruh ban bret ne pynlang ïa ki jaboh jabaiñ, ha ki jaka paidbah, ki jaka khlaw, sha ki um ki wah lane ha ki bynta jong ka rud surok.
Ïa kane ka hukum la pynmih na ka bynta ka jingbit jingbiang jong ki paidbah, ka jingïada ïa ka mariang, ka jingkhuid jingsuba, bad ka jingpynneh pynsah ïa ka jingitynnad jong ka thain West Jaintia Hills District baroh kawei.
Kane ka hukum kan treikam noh mardor naduh ba la pynmih ïa ka bad kan treikam haduh ban da pynmih da kawei pat.
