Ka jingthungkam biang ïa ki Sahep ba la shongthait ka dei tang ha ka por ba lyngkot: Conrad

Shillong, Nailar 25: U Myntri Rangbah Conrad K Sangma ula ïada ïa ka jingthungkam biang ïa ki Ophisar ba la shongthait ha ki shnat treikam ba la thaw katkum ka aiñ (statutory bodies), bad ong ba kane kam shym la khang satia ïa ka lad ïohkam ki samla.
Haba jubab ïa ka jingdawa u President ka VPP Ardent M Basaiawmoit ban pynkut noh ïa ka jingpynjlan ïa ka snem treikam ki ophisar ba la shongthait hapoh ka dorbar synrai, u Conrad ula pyntip ha Ïingdorbar Thaw Aiñ, ba ka jingthungkam biang ïa ki ophisar ka dei kaba jia shisien lano bad ka dei tang na ka bynta ka por ba lyngkot.
U la ong, “Ka jingong ba ka jingpynjlan ïa ka jingshakri ki nongtrei ba la shongthait ka khanglad ïa ka lad ïohkam ki samla ka dei ka bym shisha satia. Ka jingthung kam biang ïa ki ophisar ba la shongthait ka dei kaba jia shisien lano, na ka bynta ka por ba lyngkot, bad tang khyndiat eh ban don.”
Ula ong ba kaei kaba ka VPP ka shim kum ka jingpynjlan ka dei ha ka jingshisha ka jingthungkam kat kum ka aiñ ba la pynkupbor da ki aiñ ka Sorkar Pdeng.
U la bynrap, “Kane kam dei ka jingpynjlan ïa ka jingshakri. Ki dei ki jingthungkam sha ki shnat treikam kum ka State Information Commission, Farmer’s Commission, State Food Commission, Public Service Delivery Commission bad RERE kaba donkam ïa ki riewshemphang bad kiba la tip bha shaphang ka kam.”
Shuh shuh u la kdew ba ka kyndon 22 jong ka RERA Act, 2016 ka donkam ia ki Chairperson bad dkhot bala don jingshemphang haduh 15-20 snem ha ka Urban Development bad housing, kyndon 15 jong ka RTI Act, 2005 ka donkam ia u briew ba paw ha ka jingim paidbah ryngkat ka jingtip ha ka ain, science, social service bad administration bad ka kyndon 16 jong ka National Food Security Act, 2013 ka donkam ïa ki Civil Servant barim kiba tip bha shaphang ka food security bad ka rep ka riang.
U Myntri Rangbah haba ai jingkheiñ ïa ka ïohkam ïohjam, u pyntip ba ha kine ki lai snem ba la leit, ka Sorkar ka la pynmih ïa ka jingpynbna laitkam ba palat 9000 tylli ki kam bad la pyndap haduh 1011 tylli ki kam lyngba ka MPSC, 2413 lyngba ka Central Recruitment Board for Police, 769 ki doktor lyngba ka Medical Service Recruitment Board bad 1686 lyngba ki District Selection Committee.
La ong ba ka jingphaikhmat jong ka Sorkar kam long satia tang ha ki kam Sorkar. “Naduh u 2019, palat 3.6 lak ki lad kamai la thaw ha ki kam bapher bapher. Tang ha kine ki lai snem ba la leit, kumba 50,000 ki lad sengkam bad bylla la thaw na ka bynta ki samla lyngba ki prokram Livelihood and Entrepreneurship,” u la bynrap.