Ladep weng ïa ka jingkhang tih dewïong ha ka jylla dang thawlad ban ïoh tih da ka rukom ba thymmai

Shillong, Nailar 26 : U Myntri Rangbah ka Jylla Conrad K Sangma ha ka sngi Ba-ar ula pyntip ba lah dep ban weng ïa ka jingkhang tih dewiong ha Jylla bad ka ïing Bishar Supreme Court ka la ai jingbit ban tih par kat kum ka aiñ da ka buit stad saian, bad ïathuh ruh ba u Myntri ka Coal Ministry ula bthah ïa ki Ophisar ban wad ïa ka lynti treikam kiba la don lypa kiba lah ban leh na ka bynta ka Meghalaya da ka rukom tih dewiong kaba thymmai kaba kiba rit ba ria ruh kin lah ban tih ym da kaba tih da kaba klong ïa baroh uwei u lum namar ha Meghalaya kam ïahap satia.
Haba jubab ïa ka jingïatai nia kaba lyngkot bala wanrah da u President ka VPP Ardent Miller Basaiawmoit, u Conrad ula ong “Nga kmen ban pyntip sha phi ba ïa ka jingkhang tih dewiong lah dep ban weng noh. Lada don ki bym pat tip, ïa ka jingkhang tih par lah dep ban weng. Kaei kaba ka Supreme Court ka ong ka long ba phi hap ban tih kat kum ka aiñ”.
Ula ong ba ka jingpynkynriah sha ka jingtih par kat kum ka jingstad saian ka long kaba jyrwit jyrwat bha ha Meghalaya namar ka rukom long ka riti bat khyndew bad ka jingstang ki syrtap dewiong kaba buh ïa ka rukom tih open-cast ban nym ïahap satia.
“Ka Coal Ministry kala khmih ïa ka Meghalaya ha kawei pat ka rukom bad ka hap ban thaw ïa ka aiñ ban pynbiang tarajur ïa ka jingshngaiñ bad ka ïoh ka kot” ula ong.
Ha ka jingïakynduh ba dang shen ha Delhi, u Conrad ula ong “Nga la ïakynduh ïa u Coal Minister lem bad ka MLA na Sutnga-Saipung. U Myntri ha ka jingïalang ula kren shai. Ula pynpaw ba un sa wad ïa ka lynti. Ula pyntip ïa ki Ophisar ba ki par bad ki trai khyndew ha Meghalaya ka ïapher bad kumta ka jingtyrwa kam lah ban dei da kajuh. Nga la kyrpad ïa ka lynti ban pynbeit da ka por bad u Myntri ula ai ka jingbthah”.
U ong ba ka Jylla ka kyrmen ba ka jingbuh kyndon ba 100-hectare ba duna eh ka jaka yn sa pynduna bun shah sha u pud ba lah ban pyntrei na ka bynta ki nongtih par trai jylla, ryngkat ki buit treikam bad ki lad jingïada ban ïada ïa ki nongtih par bad ïa ka mariang.
U Conrad ula ong ba ula batai bniah ruh ïa u Additional Secretary ka Coal Ministry ba balei ka Meghalaya ka donkam ïa ka jingïarap ba kyrpang.
U CM ula ong ba ka Sorkar ka mynjur bad u nongwanrah ïa ka mat iatai bad sngewthuh ia ka jingeh jong ki nongtih par tynrai kiba duna ka jingnang jingtip bad shem jingeh ban pyntreikam ia ki technology ba thymmai hadien ba ka NGT kala khang kynsan ïa ka jingtih dewiong.
Haba kdew ïa ki jingeh ban pyntreikam, ula ong ba tang ha East Jaintia Hills ki don haduh 22,000 tylli ki par dewiong.
“Kat kane ka jingbun ki par, phim lah ban pyrkhat. Ka dei ka jingïaksaid ïa ki Ophisar ban pynthikna ba ki kam ki ïaid kat kum ka aiñ” ula ong.
Ula ïathuh ba ka jingtih par beaiñ ka la lam sha ka jingkhang ïa ki par bad ktah ïa ka kamai jakpoh, hynrei ka Sorkar ka dang trei ïa ki kam ban pynthikna ba ka jingtih par kat kum ka aiñ kan ïai bteng bad ba ki kam beaiñ kin sangeh noh.