Ka jingkhot tender ba 850 klur tam da ka EPC Mode ïa ka NSWSS ka dei ban pynthikna dep haka por ba la buh : Myntri

Shillong, Nailar 25: Ka Sorkar Jylla ka la pynksan ïa ka jingkhot Tender kaba 850.589 klur tyngka jong ka New Shillong Water Supply Scheme Phase-II (Part A) ha ka EPC Mode, ka dei ban pynthikna ïa ka jingkitkhlieh bad ïa ka jingpyndep ïa ka jingtrei ha ka por kaba la buh.
Kane ka jingkren u Myntri ka tnad PHE u Marcuise N Marak ka dei haba jubab ia ka Zero Hour Notice kaba la wanrah da u MLA ka Nongkrem u Bah Ardent Miller Basaiawmoit ha ka sngi Ba ar jong ka Dorbar Synrai.
Haba pyntip hapoh ka ïing Dorbar u Marak ula ong, “Ka jingtei ïa ka New Shillong Water Supply Scheme, Phase-II (Part A) ka dei kaba la mang ha ka 30 tarik u Naitung 2026 ha ka jinglut jingsep kaba kot 850.589 Klur tyngka bad la khot ïa ka Tender lyngba ka EPC Mode ha ka 31 tarik u Naitung 2026.”
Ula ong ba kane ka projek ka kynthup ïa ka jingsorjamin ïa ki jaka, jingjurip, jingpynwandur bad ka jingpynïaid ïa ka pump um kaba kongsan sha ka Water Treatment Plant na Mawpdang sha MCWR-1 ha Mawlynrei bad MCWR-2 ha Umsawli, ka jingtei ïa ka Main bad Zonal Clear Water Reservoirs, Feeder and Distribution Mains, Pump Sets bad ka RCC Pump House, DG Sets, ki sainar bording elektrik bad ka Sub-Station, ryngkat bad ka surok, IoT bad SCADA Systems, Laboratories, Hydrants bad jingpyndonkam biang ïa ki jingdon jingem kiba la don lypa.
U Marak ula ong, ba katei ka Mode ka dei kaba biang tam na ka bynta ka Urban Water Supply Schemes kaba heh bad kaba kynthup ïa ki bynta kum ka Intake, WTP, Pumping Stations, Transmission and Distribution Networks bad ki bynta kiba ïadei bad ka bording elektrik.
Ula ong, “Hapoh jongka EPC, u nongtrei un khmih bad ïatrei hapoh jong uwei u kontraktor u ban shim ïa ka jingkitkhlieh ban ïatreilang halor ka jingpynwandur ïa ka design, ka jingthied ïa ki mar ki mata, jingtei, jingkhmih bniah, jingpyntreikam bad ka jingpyni ïa ka rukom pyntreikam. Kane kan pynduna ïa ka jingthud bad ïa ki kynrum kynram ha kaba ïadei bad ka jingkitkhlieh bad ban pynkloi ha ka ban pynbeit ïa kino kino ki jingeh kiba mih”.
Kat kum ka jingong u Myntri, ka EPC kan pynthikna ïa ka rukom pynlut kaba bun, jingpyntreikam kloi lyngba ki jingpyntreikam kiba bun kiba ïaid ryngkat, ka jingpynkynriah ïa ki projek kiba don jingma sha u kontraktor bad ka jingtrei kaba don ïa ka jingkitkhlieh”.
Ki jingma kiba ïadon bynta bad ka Detailed Engineering, jingthied ïa ki tiar, ka rukom shna, ka jingpynïasoh ïa ki tiar ki tar bad ka jingseisoh jong ki katto katne ki bynta ki dei kiei kiei kiba lah ban aiti ha ki EPC contractor. Lada ïa ka kam la phiah ha kiba bun tylli ki kyrdan ne Package. Ka Tnad kan mad ïa ka jingeh kaba khraw ha kaba ïadei bad ki jingtynjuh ki ban mih na ka jingïatreilang” ula ïasaid.
U Marak ula kdew shuh shuh ba kiba bun tylli ki kyrdan kan lam sha ka jingpynmih ïa ki jingeh jong ka jingpan jingbit bunsien na ka PWD, MeECL, Urban Affairs bad Pulit ban tih ïa ka surok, ban pynkynriah ïa ki tiar ki tar bad ha kaba ïadei bad ka jingkhmih ïa ka jingshngain.
“Ka rukom leh da ka EPC kan pynduna ïa kine ki jingeh da kaba pynkhamti ïa kiba bun ki jingkitkhlieh ha uwei u Kontraktor. Kane kan kiar na don bun ki kynrum kynram, ka jingtrei bunsien bad ka jingpynslem kaba lah ban mih, lada don bun ngut than ki kontraktor ha ki tnad bapher bapher” ula ong.
Ula banjur ba ïa kino kino ki jingduna ne jingdkoh bad ïa ka O&M kaba 3 snem kan shah pyntlot noh lada ki don bun ngut than ki kontraktor, kan pynlong ban buh jingeh ban pynkhamti ïa ka jingkitkhlieh haba don kano kano ka jingpulom ne ka jingthud ha kaban pynpoi ïa ka umbam umdih kaba 24×7 katkum ki kyndon jongka CPHEEO.
U Marak ula pynapw ba ka Bidding lyngba ka EPC ka long kaba don nongrim bad kan “pynbiang ïa ka rukom treikam kaba janai, pynduna ïa ka jingïatreilang bad kiwei pat bad ïa ki jingma, pynbha ïa ka jinglut jingsep bad ïa ka por, ka jingpynïaid bad jingkyrshan kaba biang por ïa ka rukom treikam kaba pura, shaniah bad kaba treikam jong ka jingsam ïa ka umbam umdih ha New Shillong.”