Shillong, Nailar 24 : U nongïalam ba la slem bha ha ka National People’s Party (NPP) ba dei ruh u MP barim ka Jylla sha Rajya Sabha, Dr. WR Kharlukhi ha ka sngi Nyngkong u la resaiñ noh na ka party bad phah ïa ka shithi iehnohkam jong u sha u President ka party, Bah Prestone Tynsong.
Ha ka shithi sha u State President, une u MP barim u la ong, “Nga phah ïa ka shithi iehnohkam jongnga na ka jinglong dkhot ha ka National People’s Party naduh mynta ka sngi.”
Shuh shuh u la kyrpad ruh ïa ka party ba kan pdiang ïa ka jingiehnohkam jong u bad shim ruh ïa ki sienjam ban weng noh ïa ka jinglong dkhot jong u ha ka party mardor naduh katei ka sngi.
Da kaba pynpaw ïa ka jingsngewnguh ïa ka party, u Dr. Kharlukhi u la ai khublei ïa baroh ki nongïalam jong ka party bad ki ba treilang ha ka party namar ka jingkyrshan bad ka jingïatrei lang bad u ha kine ki snem baroh ha ka party.
