SHILLONG, Nailar 24: Ka Mawpat SC bad ka Umphrup SC ki la jop ïa la ki jong ki jingïalehkai ha ka lympung Second Division Football league 2026 ba la pynïaid da ka Shillong Sports Association, hynne ka sngi Nyngkong ha Polo.
Ha SSA Ground, ka Mawpat SC ka la pynliem noh da 2-0 ïa ka Nongrah SC. ïa kine ki kol la thep da u Donboklang Lyngdoh (44’) bad u Arnisius Marwein (76’).
Nangta ka jingïakhun kaba ar ha MFA Ground, ka Umphrup SC ka la pynjemkhnap ïa ka Mawkriah West SC da ka jingjop kaba da 4-1. Ka Umphrup ka la pynkhihjar lyngba u Nangkhrawkupar Kharumnuid (42’), u Nangpynkhraw Kshiar (81’), bad ar tylli ki kol na u Batkular Mawthoh (85 & 89’). Ka shi kol jong ka Mawkriah West la thep da u Kyrshanborlang Rangdkhew (68’).
Ki ar tylli ki jingïalehkai SSA 2nd Division 2026 ha kane ka sngi ba-ar (25.08.2026); nyngkong ha SSA Ground ha ka por 12:30 baje mynsngi ka Mawryngkneng SC kan aireng pyrshah ïa ka Smit SC, nangta ha MFA Ground ha ka por 3:30 baje nohphai sngi ka Umlyngka SC pyrshah ïa ka Nongmynsong SC.
