Pynlong ka Don Bosco College Byndihati ïa ka Graduation Day celebration & Ai mynsiem u MP- Rajya Sabha ïa ki samla pule
Khliehriat, Nailar 23: Ka Don Bosco College, Byndihati, East Jaiñtia Hills District hynnin ka sngi thohdieng ka la pynlong ïa ka jingpynkupburom ïa ki samla pule jong ka college, ka Graduation Day celebration ha kaba phraphew saw ngut ki samla pule la pynkupburom ïa ki bad la sakhi lang ruh ïa kane ka sngi da u Member of Parliament (Rajya Sabha), u James PK Sangma kum u kongsan bad la ïa don ryngkat lang ruh u Principal jong ka college u Fr. (Dr.) Daniel Dabitlang M Cajee.
Haba kren ha kum u kongsan, u James PK Sangma, u la ai ka jingkhublei kitbok kitrwiang bad ai ruh ki kyntien pynshlur bad ai mynsiem ïa ki samla pule kiba la shah pynkupburom, u kyntu ia ki ba ki dei ban nang ïaid shaphrang ban poi sha ka thong, ban long kiba treishitom bad duriap ha ki jingpule, ban iakhun pyrshah ïa kino kino ki jingeh ban poi sha kaba ki thmu, ha kajuh ka por u kongsan u la ai ruh ïa ka Presidential adress kaba u la pynsngew ïa ki policy jong ka sorkar bad ki jingthmu jong ka sorkar ban kyntiew ïa ka pule puthi,
Ha kane ka sngi ba kyrpang la ïa don lang ruh u Prof. Ghanashyam Bez, uba dei u Director jong ka College Development Council NEHU, u Deputy Commissioner ka East Jaiñtia Hills District, u Manish Kumar, IAS, u Superintendent of Police East Jaiñtia Hills District, u Shailendra Bamaniya, IPS, u Fr. Jeevan Kishore Lakra, uba dei u Vice Provincial jong ka Salesian Province Shillong, ki kmie ki kap jong ki samla pule, ki riew niam lane ki priest kiba na ki shnat bapher bapher lem bad kiba shah khot sngewbha, la sdang ïa ka prokram da kaba rwai ia ka National Anthem jong ka ri bud pat sa ka jingtbeh ding sharak bad u Fr. (Dr.) Daniel Dabitlang M Cajee, u la ai ïa ki kyntien pdiang sngewbha ïa baroh kiba wan sha kane ka Graduation day prokram.
U kongsan da lade hi u la sam ïa ki syrnot sha ki samla pule kiba shah pynkupburom.
La pynphuh pynphieng ïa kane ka sngi da ki jingshad tynrai na ki samla pule jong ka college, ki jingrwai bad la ioh ruh ïa ka jingrwai ba kyrpang ba baang ba thiang ba la pynbit pynbiang da ka Don Bosco College Choir Byndihati.