Donkam ban pynneh pynsah ïa ka ktien tynrai, ki jingrwai, ki jingshad kiba la hiar pateng la pateng

Jowai, Nailar 22: Ka Meghalaya Society for Cultural and Folklore (MeSCaF) ha ryngkat ka jingïatreilang ka tnad Cultural and Creative Studies, NEHU, Shillong bad ka Kiang Nangbah Government College, Jowai ki la rakhe ïa ka ‘World Folklore Day’ ha kane ka 22 tarik Nailar, ha District Library Auditorium, Mynthong, Jowai.
Ha kane ka sngi u Puramon Kynjing, u Daloi Elaka Jowai ula long kum u Kongsan bad u ma Wanphrang Gassah uba dei u District Librarian kum u symbud kongsan, haka jingdonlang u Prof. Desmond Kharmawphlang, ma Hercules Toi, Principal KNGC, Dr. Rimika Lanong, Executive Member, ma Pynjanai Mallai, President bad ma Barikupar Paswet, General Secretary ka MeSCaF.
Haba ai jingkren u ma Puramon Kynjing ula pynpaw ïa ka jingdonkam ban pynneh pynsah ïa ka ktien tynrai, ki jingrwai, ki jingshad kiba la hiar pateng la pateng. Ula ong ruh kum ki paidbah ka jylla ki long kiba donbok ban don ïa kum kine ki riti dustur bad kaba donkam mynta ka long ban pynneh pynsah ïa ki.
Ula kyntu ïa ki khun samla khamtam ïa ki khynnah skul ba kin kheiñ kor bad pyndonkam hok ïa ka jingnang jingstad ba la ïoh na ki longshwa manshwa bad ban sam lem ïa ki jingtip haka imlang ka sahlang.Ula ban jur halor ka jingdonkam ban burom ïa ka ktien ka thylliej, ka akor ka burom, ka riam ka beit bad ri sumar ïa ka kolshor la jong.
U ma Wanphrang Gassah ula kyntu lang ïa baroh ban pynim ïa ki riti dustur hapdeng jong ka juk ba mynta, ula pynsngew ïa ka jingdonkam kum ki khun samla ban pynriewspah shuh shuh ïa ka riti ka dustur la jong naduh ka ktien ka thylliej, ki jingrwai tynrai, ki jingïathuh khana ki longshwa na ka bynta ka pateng ban wan.
U Prof. Desmond Kharmawphlang ula ong watla ka Meghalaya Society for Cultural and Folklore (MeSCaF) ka dang dap shisnem hynrei kaba leh shibun ki kam da ka pynlong ïa ki prokram ha Shillong bad ha Jowai. Ula kyntu ruh ban kyntiew shuh shuh ïa ka jinglong tynrai.
U Dr. R. Lanong ula kren shaphang ka jingsdang bad jingmut jong ka Khanatang (Folklore) bala ai kyrteng da u William Thoms ha ka snem 1864.Kaba long kawei na ki mat ba kongsan ban pynneh pynsah ïa ka jinglong tynrai, ka jingïathuh khana bad ka rwai ka siaw jong ki pateng.
Na ka liang u ma Hercules Toi haka kren pdiang ula pynsngew ba ka khanatang ka long ka bynta kaba kongsan eh ha ka imlang sahlang.Ula kdew hapoh ka National Education Policy (NEP) ka don ka bynta ba kongsan eh ban pynneh pynsah ïa ka jinglong tynrai.Katba na ka liang nongïashim bynta kiba pyni ïa ki jingïalehkai tynrai ba bun jait.