Shillong, Nailar 23: Haba pynthikna ba ka jinglong jingman ka la wanphai biang ha khappud Assam-Meghalaya, u Deputy Commissioner ka Ri-Bhoi u Dr Abhishek Saini ha ka sngi u Blei u la ong ba la weng noh ïa baroh ki jingkhang surok bad ka don ka jingiaid laitluid jong ki kali ha Umiam.
U Saini u la ong ba ka All Khasi Meghalaya Tourist Taxi Association bad kiwei kiwei ki kynhun, kiba la ïa lum lang ha Umiam da ki katto katne ki jingdawa, ki la mynjur ban pynkut noh hadien ka jingialang ba la pyniaid da u Symbud Myntri Rangbah.
“Ki la don ki Association jong ka Jylla Meghalaya, khamtam ka All Khasi Meghalaya Tourist Taxi Association, kiba la ïa lum lang ha Umiam.Ki la don katto katne ki jingdawa bad mynta ka sngi ngi la don ka jingialang bad u Symbud Myntri Rangbah ryngkat bad baroh ki association, ma nga bad u SP bad na Shillong ruh kumjuh.Ka jingialang kaba seisoh ka la mih bad ki la mynjur ban iapynkut noh”, u la ong.
U DC u la ong ba da ka jingweng noh ka Assam ïa ka jingkhang dam ha Jorabat, ka liang ka Meghalaya ruh ka la weng noh ïa ka jingkhang surok.
“Yn ym don shuh kano kano ka pakhang surok.Kumba ngi tip na ka liang ka Assam, la weng noh ïa ka pakhang surok na Jorabat kumta mynta na Umiam ruh, ki seng tourist taksi kin sa weng noh ïa ka pakhang surok jong ki bad kan don ka jingïaid laitluid jong baroh,” u la ong.
Haba kyrpad ïa ki nongjngohkai pyrthei ba kim dei ban tieng, u la ong, “Nga kyrpad ïa baroh ki nong jngohkai pyrthei bad ïa baroh ki briew kiba wan na Assam ne kiba leit na Meghalaya sha Assam – la pdiang sngewbha ïa ki bad kan don ka jingïaid lynti kaba laitluid pura mynta. Ngim kwah ban don ïa kano kano ka jingtieng ha ka jingmut jingpyrkhat jong ki paidbah.”
U la ong ba ka bor pyniaid district ka shim khia ïa ka jingshngain jong ki nongshong shnong bad ki nong jngohkai pyrthei bad la pynbiang da ki pulit escort ïa ki trok kit umphniang kiba la sangeh kham mynshwa namar ka jingtieng.
“Ka jingkit ka la sdang hynrei haduh mynta ki don napdeng jong ki namar ka jingtieng bad ki khubor kiba iaid kylleng, kim shym la lah ban ïaid.Ngi pynbiang ïa ki pulit escort ruh.Yn ym don kano kano ka jingsangeh ïa kino kino ki trok kit umphniang la ka long ka POL, LPG ne ki mar ba kongsan bad kumjuh ruh ki kali shimet,” bynrap biang u Saini.
Ha kajuh ka por, u SP u Giri Prasad u la ïathuh ba la pyntreikam ïa ka tourist helpline ba kyrpang 24×7 – 1800592026.
“Kino kino ki nong jngohkai pyrthei kiba leit sha Meghalaya lane na Meghalaya sha Guwahati ki lah ban phone ha une u number 1800592026.Kino kino ki nong jngohkai pyrthei ha kano kano ka jaka ha Meghalaya lane kiba pyrshang ban wan sha Meghalaya, lada ki ïakynduh ïa kino kino ki jingeh, ki lah ban pyntip sha une u number bad yn sa pynpoi sha ki District bapher bapher khnang ba ngin lah ban ïarap ïa ki baroh” u la ong.
