5 ngut ki nongpynkulmar shnong ha ka 19 tarik ba sop spaiñ ïa ki durkhmat ladep ithuh ka sorkar: Dy.CM

Shillong, Nailar 22 : U Symbud Myntri Rangbah ka jylla u Ma Sniawbhalang Dhar u la ïathuh ba san ngut na ki riew tap khmat kiba donkti ban pynkulmar shnong bad pynjulor ïa ki kali ba don u rejistration number jongka Assam ha ka jingjia ha ka 19 tarik la dep ithuh da ka sorkar bad ka dang thwet jur ban ïoh kem ïa ki.
ïa kane ula ïathuh ha ka jingïalang mynta ka sngi bad ka Sorkar Assam ban ïakren pynbeit kumno ban wanrah ka jingshngain ha ka leit ka wan jong ki briew hadien ka jingjia ha ka sngi ïaid rally bad rah lama iong ka KSU da ki thuk thuk ha kane ka nongbah Shillong.
U la ong ba ka sorkar jylla ka sngewkhia jur shisha halor kane ka jingjia bad ka kular ruh ba kan leh da kaba tyngeh ïa kito baroh kiba donkti.
U la ïathuh la kem ïa u President, Vice President bad General Secretary ka KSU bad pynngat ïa ki ha ka kyndon Meghalaya Maintenance of Public Order Act bad la rejister ruh 15 tylli ki ejahar halor katei ka jingjia thombor ha katei ka sngi.
“ Na kito kiba sop spain ïa ki dur khmat jongki bad leh ïa ki kam pynkulmar la dep ithuh ïa ki bad shen yn sa ïoh kem ïa ki” ong u Ma Sniawbha.
U la ïathuh ba la thung ruh ïaka Special Investigation Team ban thwet bad bud dien ïa kitei ki briew kiba donkti ha katei ka jingpynkulmar shnong bad pynjulor ïa ki kali bad ki bus khamtam ïa kito kiba donkti ban pynjulor ïa ki kali ba don u number plate na Assam.