80-90% la pynsangeh noh ki nongwan shang suwari ïa ki kamra Hotel ba ki ladep batlypa

Shillong, Nailar 22 : Ka kam jngohkai ha Meghalaya kala shah ktah jur na ka jingmih ka jingkhihwin hapdeng ka Assam-Meghalaya, ha kaba ki Hotel bad Homestay ha Shillong, Sohra (Cherrapunjee) bad ki jaka kiba marjan, la pyntip ba ka la don haduh 80–90 percent ka jingpynsangeh noh ïa ka jingwan namar ka jingbym thikna ka leit ka wan hapdeng kine ki ar tylli ki jylla.
Ka jingkhang lynti ïa ki kali ban ïaid ha Jorabat, ryngkat bad ka jingmih katto katne ki jingjia kiba dang shen ha Shillong, ka la lam sha ka jingpynsangeh noh bad ka jingkylli bniah na ki nongjngohkai halor ka jingsngewkhia shaphang ka jingshngaiñ bad ka leit ka wan ha Meghalaya.
Kumba 1,400 tylli ki Hotel bad Homestays kiba treikam ha Shillong, Sohra bad jaka kiba marjan, katkum ka Federation of Shillong Hotels (FOSH).
“Namar ka jingdon ka kynrum kynram, kumta 80–90 percent jong ka ‘Booking’ ïa ki jaka sah lah dep ban pynsangeh noh da ki nongjngohkai. U Nailar ula dei lypa u bnai uba duna ka jingwan sah ha ki Hotel ha Shillong bad Sohra bad ka jingsah ka long tang kumba 20 percent. Ngi lah don ïa ka jingbat lypa ne Booking na kylleng ki jaka hynrei mynta ïa kitei baroh lah dep ban pynsangeh noh” la ong u President ka FOSH u Parambir Singh Sehdave.
U Sehdave ula ong, ba ki jaka sah ki don haduh kumba 15,000 tylli ki kamra sah katkum ka jingbuh ïa ka jingdon 10 tylli ki kamra ha kawei ka jaka sah.
Kane ka jingpynsangeh ka la wan haba ka kam jngohkai ha Meghalaya kan pdiang ïa ki samoi lehkmen jong ka Puja bad Christmas, ha kaba ka don ka jingjur bha jongka jingwankai jongki nongjngohkai.
“Kane kala ktah jur ïa kiba pynïaid ïa ki jaka sah ha Meghalaya ha ka por ba kan jur bha ka jingwan ki nongjngohkai ha ka por ba don ka Puja bad Christmas. Ngi kyrmen ba ka jinglong jingman kan sa bha noh bad sa shisien kiba pynïaid ïa ki jaka sah ha Shillong bad Sohra kin shlei biang da ki nongjngohkai” ong u Sehdave.
Ka Tour Operators Association of Meghalaya, Meghalaya Rural Tourism Forum, Tour Guides Association of Meghalaya, Federation of Shillong Hotels, Meghalaya Tourism Development Forum and Meghalaya Rural Tourism Cooperative Federation kila pynrem jur ïa ka jingthombor bad ka jingpynjulor ïa ki kali kiba wan na shabar ka jylla, kynthup ïa ki Tourist Taxi bad Bos bad wat ïa ki paidbah kiba ïaid ba ïeng.
Kine ki synjuk ha ka kam jngohkai ki la maham ba kum kine ki jingjia kin ktah jur ïa ka nam bad burom jong ka Meghalaya kum ka jaka kaba pdiang sngewbha ïa ki nongjngohkai bad ki la ong ruh, ba kila sakhi ïa ka jingpynsangeh noh jongki nongjngohkai ban wankai sha ka jylla khamtam haba kala don ruh ka jingpynbor bad jingpynphai kylla na ka liang jong ka Jylla Assam.
Kila pynpaw ruh ba ka kam jngohkai ka kyrshan ïa kamai jakpoh palat ïa ka 30 percent na ka jingdon ki nongshong shnong ha Meghalaya bad kane kala ktah jur ïa kiba pynïaid ïa ki Homestay, Guide, nongniah kali, jaka bam, ki nongthaiñ jingthaiñ bad ki nongkhaïi kiba rit kiba shaniah tylli ha ka kam jngohkai kaba neh bad kaba shngaiñ.
U Sehdave ula ong ba ki nongjngohkai ki la ïai bteng ban phone sha ki Hotel ban kylli bniah la ka long ne em kaba shngaiñ ban leit ban wan sha Meghalaya.
“Baroh ar ka Sorkar Meghalaya bad Assam ki dang pyrshang ban pynbeit ïa kane ka jingeh. Ngi kyrmen skhem ba yn lah ban pynbeit noh shen, hynrei ki nongwankai ki ïai kylli la ka biang ne em ïa ki ban wan sha Meghalaya bad ngi lah ai jingmut ïa ki ba kin ap shwa tad haduh ba ka jinglong jingman kan bha noh” ula ong.
Kiba don bynta ha ka kam jngohkai mynta ki dang khmih lynti ba kan don noh ka jingpynbeit mardor ïa kane ka jingïapynibor bad ka sheptieng ba lada kane kan dang ïai bteng ka lah ban ktah jur syndon ïa kam jngohkai bad ïa kiba im jakpoh, ha ki bnai tlang kaba dei ka por kaba jur bha ka jingwan jong ki nongwan jngohkai.
Ki la kyntu ruh ïa ki nongshong shnong ba kin tehlakam bad ban ym pynphai kylla, da kaba banjur ba ïa ka jingïapher jingmut dei ban pynbeit lyngba ka jingïakren ym da ka jingïapynibor.