Kynduh u Lamphang ïa u Jual Oram u myntri ka sorkar pdeng halor ka DPR jong ka ïingdorbar thawaiñ

Shillong, Nailar 21: U Lamphang ka Ïing Dorbar Thawaiñ ka jylla Meghalaya u Thomas A Sangma u la ïakynduh ïa u Myntri ka sorkar pdeng ba peit ïa ka Tribal Affairs u Jual Oram ha New Delhi ha ka sngi Thohdieng bad aiti ruh ïa ka detailed project report (DPR) na ka bynta ka wad kaba ar jong ka Meghalaya Legislative Assembly building kaba thymmai.
Ha kane ka jingiakynduh, u Sangma u la rah ruh ïa ka mat kaba dang sahteng jong ka bhah central jong ka scholarship na ka bynta ki samla pule riewlum jong ka jylla Meghalaya bad kyrpad ïa u myntri ka sorkar pdeng ban pynsuk ban pyllait kloi ïa ka.
Shuh shuh u la kyrpad ba ïa ka pisa kaba dang sahteng dei ban pyllait ha kawei ka bynta (installment) ha ka jaka ban pyllait bunsien, da kaba pynpaw ba kane kan lait na ka jingbym thikna bad jingbym sngewhun hapdeng ki samla pule kiba ap jingïarap.
U Lamphang u la ban jur ïa ka jingdonkam ban ai ïa ka pisa scholarship ha ka por kaba biang khnang ban pynthikna ba ki samla pule riewlum kin ym ïa kynduh jingeh ban bteng ïa ka jingpule jong ki.
Ha kane ka jingialang la ïakren ruh ïa ki kam kiba ïadei bad ka roi ka par jong ka ïing dorbar thawain ka jylla Meghalaya bad ka bha ka miat ha ka pule puthi jong ki samla pule riewlum ha kane ka jylla.