Poi 5 kynhun ki CRPF, 1 kynhun ki RAF bad SOT ban syrtap ha Khyndailad ba suba ïakhih ka KSU

Shillong, Nailar 21: Ki Pulit ka Nongbah Shillong naduh ka step jong ka sngi Thohdieng ki la pynjur ka jingpahara bad ban talasi ruh ha ki jaka bapher bapher jong ka Nongbah Shillong khamtam eh ïa ka Khyndailad, police bazar.
Kane ka jingtalasi kadei ruh halor ka jingpynbna ka KSU bad suba ruh ban pynlong ïa ka jingshong kyllaiñ myngngor ha Khyndailad bad kumjuh ruh na ka daw ba ki bor pynïaid district ki la pyndam noh ïa ka jingai jingbit ïa ka seng KSU hadien ba la mih ki huri hura ha ka miet jong ka 19 tarik mynta u bnai halor ki 5 tylli ki mat jingdawa kiba ka KSU ka la buh ïa ka sorkar ba kadei ban pynurlong hapoh ki 15 Sngi ba la ai por bad kiba la kutnoh.
Kane ka jingtalasi kaba la sdang naduh mynstep la ïohi ba ki pulit ki kham khmih bniah bha ïa ki ar shaka, kiba wan na Motphran ban leit sha Khyndailad bad kiba la shah bat ha lad Umsohsun.
Ha Khyndailad pat la dap bad syrtap bun da ki pulit Special Operation Team (SOT), ki CRPF bad 1 kynhun ki Rapid Action Force (RAF) kiba la dep ban pan da ki bor pynïaid distrik ka East Khasi Hills hadien ba la mih ka huri hura ha ka jingïaid bike rally ka KSU ha ka sngi Balang une u taïew bad la ïohi ruh ba ha Khyndailad ha ka jaka ba ju pynlong jingïalang barabor la buh lypa da ki jingker nar bad kumjuh ruh ka kali synreit um ne Fire Brigade kum ka jingpynkhreh ïa ki lad jingïada.
Ha kane ka sngi la ïohi ba ki ar shaka kiba la shonglang ruh bad ki longkmie ne ki kynthei ki la shah pynhiar na ki jaka shong naba talasi ki pulit bad kane ka la ïaid baroh shi sngi ban pynthikna ba kan ym mih shuh kano kano ka jingjia kaba sngewsih bad kaba pynkulmar ïa ki paidbah ba lui lui ha ki surok bad ki lynti syngkien kiba dang ïaid bad leit sha la ki jong ki kam ki jam.
Ha kane ka sngi la ïoh ba jan baroh ki dukan ha baroh shi lynter jong ka Khyndailad ki la bun kiba khang ha kitei ki kynta khnang ban ïada na kino kino ki jingjia ba sngewsih ne ki jingshah pynjulor ki jingdon jingem jong ki na ki riew runar bad ki riew shim kabu.
Ha kane ka sngi la ïohi ruh ba ka lynti ïaid kjat kaba ha Khyndailad ka la long kaba kynjah bad duna bha ki briew kiba ïaid ba ïeng ha kitei ki kynta naba salia ïoh mih ki huri hura bad kiwei kiwei pat ki jingjia kiba ktah ïa ka imlang sahlang.