Markylliang shah pynphai ki kali Meghalaya, Assam ha Jorabat bad ha Umiam

Nongpoh, Nailar 20: Hadien ka kynrum-kynram kaba la mih ha nongbah Shillong ha ka 19 tarik u Nailar 2026, naka jingshah kawang maw ki kali paidbah bad ki kali na Assam ha ka por ba ka Khasi Students’ Union (KSU) ka dang pynlong ïa ka jingïaid rally da ki thuk thuk, mynta ka sngi ka 20 tarik u Nailar, bun ki kali Meghalaya ruh ki la shah bat bad shah pynphai noh ha Jorabat, bad tang ki kali Ambulance bad ki kali kit nongpang la shah ban rung sha Assam.
Hadien ka jinglum briew bad ka jingshah khang ki kali Meghalaya ban rung sha Assam naka liang ki bor district bad pulit ka Ri-Bhoi kila hiar mar mar sha katei ka jaka ban tem ïaka jingkynad hynrei, ki nongñiah kali kamai na Assam bad kumjuh ruh ka Bir Lachit Sena kila pyneh bad ailad tang ïaki kali Assam ban ïaid bad pynlong syndon ka jingshong kyllaiñ mungor ha surok bah ha Jorabat ban dawa pan map bad siew bai lut ksan ïa ki kali kiba la julor bad ruh ki paidbah kiba la mynsaw haka jing shah kawang maw ha nongbah Shillong hynnin ka sngi.
Tang hadien ka jingshah khang ki kali Meghalaya naduh ki kali kamai bad kali shimet ban rung sha Assam, ha Jorabat bad kumjuh ruh ka jingshah thombor bad shah pynpait ki kali ha Khanapara naka liang ki nongïalam bad ki dkhot ka All Khasi Meghalaya Tourist & Taxi Association (AKMTTA) kila hiar mar mar sha Lad Umroi ha Umiam ban kput bad jubab ïaka jingleh ki nong Assam bad khang ïa baroh ki kali Assam ban rung sha nongbah Shillong wat hapdeng ka jingdon ki pulit, namar kane ka jingkynad kala ktah shibun ïaka leit ka wan bad ka jingïadei kine ki ar jylla
Haba kren sha ki lad pathai khubor, u President ka AKMTTA, Bah Ricaldinus Dohling, ryngkat bad u Adviser, Bah John Nonglait, ki la ong ba kane ka jingkhang lynti ïa ki kali Assam ka dei ka jingpyrshah jong ka Association halor ka jingshah thombor bad jingshah pynthut ki kali Meghalaya ha Jorabat.
Ki la pynpaw ruh ba lada ym don jingïada kaba biang ïa ki kali Meghalaya kiba leit sha jylla Assam, ka Association kan dang bteng ban pynlong ïa ka jingïakhih ban pynsngew ïa ka jingpyrshah jong ki.
Ki nongïalam ka AKMTTA ki la pyntip ba ka Association ka la bat ïa ki kali kiba don ïa u registration number jong ka jylla Assam, naduh ki kali paidbah, kali shimet hynrei kim shym la pynthut pat ïa ki kali kiba kit ïa ki marbam bad ki kali kit nongpang.