Mih surok sa ka FKJGP ban pynphai ïa ki kali Assam ha Byrnihat, yn bteng tad haduh ba weng ka Assam

Nongpoh, Nailar 20: Hadien ka jingshah pynphai ki kali Meghalaya haki nongñiah kali kamai ka jylla Assam bad kumjuh ruh haka kynhun Bir Lachit Sena, ki nongïalam ka FKJGP, North Khasi Hills District hapoh ka jingïalam u Bah Lui Lyngdoh President, haka jingdonlang u Bah Ricky Majaw General Secretary lem bad ki dkhot mynta ka sngi kila hiar sha ka thaiñ Byrnihat ban khang bad pynphai ïaki kali Assam kiba thmu ban wan rung sha ka jylla.
Kane ka jingleit khang ka FKJGP ka dei hadien ba ki nongñiah kali kamai ka jylla Assam lem bad ka Bir Lachit Sena kim ailad shuh wat ïakiba leit pule, kiba leit trei bad kiba leit donkam sha Assam tang naka jingjia kaba la jia hynnin ka sngi ha nongbah Shillong.
Haba kren sha ki lad pathai khubor naka liang u Bah Lui Lyngdoh President ka FKJGP, North Khasi Hills District u la ong ba kum ka seng kala mih shakhmat hadien ka jingsngewkhia naka jingshah khang ki kali Meghalaya ban rung sha Assam kiba la pynphai beit ïaki kali, watla naka liang ka seng kala ap ioh don kano kano ka jingsngewthuh jingmut ban weng ïa katei ka jingeh, hynrei kam shym long kumta.
U la ong ruh ba kum ka seng ka sngewsih ïa kaei kaba la jia ha nongbah Shillong hynrei ym dei pat ban pynthud ïaki paidbah ba leit ba wan, ba kum ka seng ka dap da ka jingsngewkhia kaba jur, dei namarkata ka daw naka liang ki dkhot ka seng kila ap ha Byrnihat bad pynphai lut baroh ki kali Assam kiba thmu ban wan rung sha Meghalaya naduh ki ar shaka haduh ki kali heh katba ki nongñiah kali na Assam kim pat weng ïa kane ka jingïakhih ban khanglad ïaki kali Meghalaya ban rung sha Assam.