Yn pyntreikam ka sorkar ïa ka MMPO Act ban phah siew ïa baroh ki jingjulor ha bike Rally: Baranwal

Shillong, Nailar 20: U Deputy Commissioner ka East Khasi Hills u la ong ba ka bor distrik kan sa pyntreikam ïa ka Meghalaya Maintenance of Public Ordinance (MMPO) Act, ban phah siew ïa baroh ki jingpynjulor ïa ki nongkynti paidbah bad shimet ha ka jingïaid rally thuk thuk ba lam sha ki kam thombor ha ka sngi Balang.
U la pyntip ruh ba la dep ujor ïa ka ejahar halor ka jingkawang petrol bomb sha ki Pulit ha ka por ba ki khynra ïa ka ophis ka KSU ha Jaïaw.
Shuh shuh u Deputy Commissioner Abhilash Baranwal ha ka sngi Palei ula ong ba kane ka rally ka la pynkheiñ ïa ki kyndon ai jingbit bad ka la kylla long ka jingïalum paidbah ba be-aiñ.
U la ong ba ïa ki kyndon pynlong rally la pynkheiñ. Ka don ka kyndon ha ka jingai jingbit ba lada ki pynkheiñ ïa ki kyndon, ka la kylla long kam beaiñ bad ka jingai jingbit kam treikam shuh. Kumta ka la long ka jingïalum paidbah ba beaiñ bad namar kata, ïa ka ejahar la mudui bad ka jingtohkit ka la ïaid shakhmat.
Na ka liang u Deputy Commissioner u la iathuh ba ki Pulit ki dang pyrshang mynta ban wad ban ithuh ïa ki briew kiba donkti ha ka jingthang kali, pynjulor kali bad ba shoh ïa ki nongïaid nongïeng ha ka rally.
Haba kylli halor ka jingkhyllie pat ïa ka jingjulor, u Baranwal ula ong, “Ngin pyntreikam ïa ka MMPO Act bad yn pynjari ïa ka kyndon ban siew ïa baroh ki jingpynjulor ïa ki nongkynti paidbah bad shimet. Katkum ka Act, ka seng lane ki briew kiba donkti ha ka ban pynjulor kum shibynta jong kano kano ka jingïaid paidbah ne rally kin hap ban siew. Ngin sa pynmih noh ïa ka hukum.”
Halor ka jingkhynra ki Pulit ïa ka ophis ka KSU ha Jaïaw ha ka miet sngi Balang, u Baranwal ula ong ba ïa ka ejahar la dep ban mudui ba kawang petrol bomb sha ki Pulit.
U la ong, “Hadien ka jingkem ïa ki lai ngut ki nongïalam ka KSU, ki Pulit ki kwah ban kem ïa kito kiba donkti bad kiba lah ban pynthikna ïa ka jingdonkti ha ka jingthombor. Kumta, kila leit sha ophis ka KSU ha Jaïaw. Hynrei haba ki poi ha kane ka ophis, ki la shah kawang petrol bomb. Namar kata, ïa ka ejahar la ujor halor ka jingkawang petrol bomb.”
Ula ong ba ka jubab ba la ai da ki Pulit ka long kaba biang. U la bynrap, “Kam shym la don ka jingpyndonkam palat ïa ki stun grenade lane tear gas, kila hap ban pyndonkam tang uwei u stun grenade bad tear gas tang ban pynpra ïa ki briew kiba pyrshang ban thombor.”
U Baranwal u pyntip ba ka Sorkar kan sa pynmih ia ki helpline number na ka bynta ki nongjngohkai kiba sahkut ha kano kano ka jaka bad kular ban ai jingsumar ia baroh ki lanot kiba mynsaw. Haba kylli la ki bor district kin pynjari curfew, u DC ula ong, ‘Ka curfew hi ka dei ka sienjam kaba hap ban shim khatduh.”