Lehse kiba bun ki briew ki khuslai jingmut na ka daw jong ka jingsngaid kpoh palat. Ki don ruh kiba khuslai lehse naba wat lada ki la pyrshang ban pynduna ïa ka jingsngaid kpoh da kaba kilan met, pynban kine ki jingpyrshang baroh ki longlehnohei. Tangba hangne phi lah lehse ban klet ïa ki katto katne ki lad ki lynti kiba suk eh na ka bynta ban weng ïa kita ki jingkhuslai jingmut jongphi. Kine ki lad kiba suk lehse kin lah ban pynhun ïa kata jingkwah jong phi ban pynduna wandur itynnat na ka jingsngaid. Hooid ka lah ban long kaba eh ïa phi ba phin leh ïa kita ki kynja kilan met kiba eh ne pyndonkam da ka bor met na ka bynta ban pynrit ïa ka kpoh jong phi, tangba phi lah ban pyrshang da kita ki jingkilan met kiba rit bad kiba suk. Katto katne ki briew kim tip satia halor ka jingdonkam na ka bynta ban pynsyaid bha ha shuwa ba kin mih ban leit ïaid kai shabar bad ki ngeit ba kane ka dei tang ka jingpynlut por suda. Hynrei, ka jingpynsyaid ïa ki dohksah jongphi ka ïada na ka jingmynsaw. Ka jingïaid khat ba tang khyndiat, ka kynthih ne mareh katto katne por ha kajuh ka jaka, ka jingpynkhih ne khyrwait ïa ka met, dem shakhmat ban ktah ïa ki shympriah kjat bad kiwei kiwei ki rukom kilan met ba suk ki lah ban pynsyaid ïa ki dohksah na ka bynta ba phin ïaid kai shabar.
Ka Oxygen ka long kaba donkam bha na ka bynta ki dohksah ba donkam tam jong phi, lada phi kwah ïa kine ki dohksah ba kin treikam pura kumba ki dei ban long. Kumta phi dei ban kun mynsiem ne pynduna ïa ka jingring bad pynhiar mynsiem. Pyrshang ban ring mynsiem wat haba phi leh ïa kano kano ka kam ne rukom kilan met kaba suk bad pynhiar mynsiem haba phi donkam ban sei ïa ka bor. Lada phi tharai ba tang ki dohksah jong phi ki don ïa ka bynta treikam kaba kongsan na ka bynta ban leh ïa kita ki push-up ne kata ka rukom kilan met da kaba dem pyllup bad pyrshang ban rah ïa ka met bunsien da kaba shan da ki kti- kata phi la bakla. Kane ka long namar ba ka jabieng jong ngi ruh ka don ïa ka bynta treikam kaba kongsan bha ha kaba leh ïa kano kano ka kam. Kumta phi dei ban kiar na kaba peit TV ha ka por ba phi dang kilan met bad ha ka jaka jong kane phi dei ban pynleit jingmut halor ki dohksah jongphi bad sngap ïa ka jingkhih jong ki dohksah, pynbeit bad pynkhun bad da kine ki rukom leh ka lah ban nang kyntiew ïa ki jingmyntoi.
Kawei pat ka bynta ka long, lada phi kwah ban don ïa ka kpoh kaba slim bad jlih kham pynkloi ban pynrit ïa ka kpoh, ka buit ka long ba phi dei ban leh ïa kiwei kiwei pat ki jingkilan met. Phim dei satia ban pynleit jingmut tang ha kita ki jingpynkhih met pynkhih phad hynrei dei ban kynthup ruh ïa kiwei pat ki rukom kilan met bad ki Asanas kum ka Vakrasana kaba ïarap ïa phi ban khyrwait bad pynphai ia ka met jong phi. Na ka bynta kane phi dei ban pyrshang ia ki katto katne ki rukom pynskhem ia ka met wat ha kaba pyrshang ban ieng tang shiliang kjat katba kawei pat ka kjat jong phi kan neh ha syngkai, ki kti rah halor ka khlieh jongphi- kaba dei kata ka rukom kilan met Vrikasasana lane Tree pose.
