U CEM bad EM ka KHADC ki dei ban pynshai ba wantur biang ki khun ki hajar ka Hima Langrin: Titos

Shillong, Nailar 19 : U nongïalam ka Liang Pyrshah hapoh Khasi Hills Autonomous District Council (KHADC), u Bah Titostarwell Chyne u pynpaw ka jingsngewkhia halor ka jingwan tur biang ki khun ki hajar jong ka Hima Langrin sha ophis treikam ka KHADC.
Haba kren bad ki lad pathai khubor, u Bah Titos u la ong ba u sngew phylla ban ïohi ha ki lad pathai khubor halor ka jingwan tur biang ki khun ki hajar jong ka Hima Langrin sha Ophis treikam ka KHADC ban pynpaw ïa ka jingbym sngewtynnad ïa ka rai jong ka Executive Committee (EC) halor ka jingthung biang ïa u Paiem Nangtei Sing Syiemiong kum u Syiem ka Hima Langrin.
U la pynpaw ba ka long kaei kaei kaba sngewkhia ban ïohi ïa ki khun ki hajar ba kin hap ban wan tur shaduh ophis treikam jong ka District Council.
“Na ka liang u Chief Executive Member (CEM) bad u Executive Member (EM) ki la dei ban pynbeit noh ïa kane ka jingeh hapdeng ki nongïalam jong ki arliang mamla khnang ban wanrah ïa ka jingsuk jingsain,” la ong u Bah Titos.
U Bah Titos u la pynpaw ba lada ka long kumne, kane kan ktah jur ïa ka District Council namar ka kamram kaba kongsan jong ka Council ka dei ban pynneh pynsah bad pynkhlaiñ ïa ka synshar khadar. “Lada kum kine ki dang bteng ban ïai jia kan pynhiar dor bad pynpoh ïa ka dur bad ka jingmut jong ka District Council hi baroh kawei,” u la bynrap biang.
U Nongïalam ka Liang Pyrshah u la ai jingmut ba u Chief Executive Member (CEM) bad u Executive Member (EM) ba ki dei ban shimkhia ïa kane ban pynshai sha ki paidbah halor ki rai ba ki la shim. “Lada ki paidbah ki mih ban pynpaw ïa ka jingbymhun, kane ka pyni ba don kiei kiei kiba bakla bad donkam ïa ka jingpynbeit mardor,” u la ong.